अमली पदार्थांविरोधातील मोहिमेत कोपरगाव तालुका पोलिसांनी आणखी एक प्रभावी कारवाई करत कोपरगाव तालुक्यातील सुरेगाव गावठाण येथे गांजाची लागवड उघडकीस आणली. या कारवाईत गांजाची झाडे जप्त करण्यात आली असून २ लाख ७ हजार ७५० रुपयांचा मुद्देमाल हस्तगत करण्यात आला आहे. या प्रकरणी एका आरोपीला अटक करून त्याच्याविरुद्ध एनडीपीएस कायद्यान्वये गुन्हा दाखल करण्यात आला आहे.
पोलीस निरीक्षक संभाजी गायकवाड यांना मिळालेल्या खात्रीशीर गोपनीय माहितीच्या आधारे ३ जुलै रोजी विशेष पथकाने सुरेगाव गावटाण येथे छापा टाकला. तेथे संजय महिपत राऊत (वय ४५, रा. सुरेगाव गावटाण, ता. कोपरगाव) याच्या घराजवळ गांजाच्या (कॅनाबिस) वनस्पतीची लागवड करून त्याची मशागत केली जात असल्याचे आढळून आले. पोलिसांनी आरोपीला ताब्यात घेतले असता त्याने सदर झाडे स्वतः लावल्याची कबुली दिल्याचे प्रसिद्धीपत्रकात नमूद करण्यात आले आहे.
या कारवाईत गांजाची झाडे व इतर साहित्य असा २,०७,७५० रुपयांचा मुद्देमाल जप्त करण्यात आला. याप्रकरणी कोपरगाव तालुका पोलीस ठाणे गुन्हा क्रमांक २८५/२०२६ अन्वये अंमली पदार्थ व मनोव्यापारावर परिणाम करणारे पदार्थ अधिनियम, १९८५ च्या कलम ८(क), २०(अ)(i)(क) प्रमाणे गुन्हा दाखल करण्यात आला असून पुढील तपास सुरू आहे.
सदरची कारवाई ही मा. श्री मुम्मका सुदर्शन, पोलीस अधीक्षक अहिल्यानगर, मा. श्री सोमनाथ वाकचौरे, अपर पोलीस अधीक्षक श्रीरामपूर, मा. श्री अमोल भारती, उपविभागीय पोलीस अधिकारी यांचे सूचना व मार्गदर्शनाखाली कोपरगाव तालुका पोलीस स्टेशनचे पोलीस निरीक्षक श्री संभाजी गायकवाड, पोहेकॉ/मधुसूदन दहिफळे, पोना/रघुनाथ कारखेले, पोकॉ/अंबादास वाघ, पोकॉ/जयदीप गावरे, पोकॉ/राम खारतोडे, पोकॉ/अविनाश तमनर, पोकॉ/रशिद शेख, पोकॉ/प्रकाश नवाळे व पोकॉ/ युवराज खुळे यांनी केली आहे.
