जेऊर कुंभारी, वार्ताहर
जेऊर कुंभारी गावातील कृष्णा तुषार इंगळे यांनी भारतीय सैन्य दलात अग्निवीर म्हणून निवड मिळवत गावाचे नाव अभिमानाने उंचावले आहे. जिद्द, चिकाटी आणि अथक परिश्रमाच्या जोरावर त्यांनी हे यश संपादन केले असून, त्यांच्या या यशामुळे संपूर्ण परिसरात आनंदाचे वातावरण निर्माण झाले आहे.
भारतीय सैन्य दलातील निवडीनंतर कृष्णा इंगळे यांनी नाशिक येथे सहा महिन्यांचे कठोर सैनिकी प्रशिक्षण यशस्वीपणे पूर्ण केले आहे. प्रशिक्षणानंतर आता त्यांची राजस्थानमधील जोधपूर येथे देशसेवेसाठी नियुक्ती झाली असून, ते लवकरच आपल्या कर्तव्यावर रुजू होणार आहेत. ग्रामीण भागातील युवकाने स्वतःच्या मेहनतीच्या बळावर मिळविलेले हे यश अनेक तरुणांसाठी प्रेरणादायी ठरत आहे.
याच पार्श्वभूमीवर जेऊर कुंभारी येथील संजयनगर परिसरात कृष्णा इंगळे यांचा सत्कार समारंभ आयोजित करण्यात आला. यावेळी उपसरपंच जालिंदर चव्हाण, भाजप युवा मोर्चाचे सचिव किशोर गायकवाड, प्रा. मधुकर वक्ते, ओम वक्ते, रोहित आहिरे आणि राहुल निकम यांनी पुष्पगुच्छ देऊन त्यांचा गौरव केला. उपस्थितांनी कृष्णा यांच्या देशसेवेच्या भावनेचे कौतुक करत त्यांच्या उज्ज्वल भवितव्यास शुभेच्छा दिल्या.
यावेळी बोलताना कृष्णा इंगळे म्हणाले, “भारतीय सैन्य दलात देशसेवा करण्याची संधी मिळणे हे माझ्यासाठी मोठे भाग्य आणि अभिमानाची बाब आहे. प्रशिक्षण यशस्वीपणे पूर्ण झाले असून, आता जोधपूर येथे देशसेवेची जबाबदारी पार पाडण्यासाठी मी सज्ज आहे. देशाच्या सेवेसाठी नेहमीच प्रामाणिकपणे कार्य करेन.”
कृष्णा इंगळे यांच्या या यशामुळे जेऊर कुंभारीसह संपूर्ण परिसरातून त्यांच्यावर शुभेच्छांचा वर्षाव होत असून, त्यांची वाटचाल ग्रामीण भागातील युवकांसाठी प्रेरणादायी आणि आदर्शवत ठरत आहे.
