

कोपरगाव प्रतिनिधी
वारी ता. कोपरगाव येथे अवैधरित्या तलवार बाळगून फिरणाऱ्या तरुणावर कोपरगाव तालुका पोलिसांनी कारवाई केली आहे. शिवाजी दादू कोतकर (वय २८, रा. वारी) असे संशयिताचे नाव असून, त्याच्याकडून अंदाजे पाच हजार रुपये किमतीची २४.५ इंच लांबीची तलवार पोलिसांनी जप्त केली आहे.
याबाबत मिळालेली माहिती अशी की, दि. १६ नोव्हेंबर रोजी कोपरगाव तालुका पोलीस स्टेशनचे पोलीस निरीक्षक संभाजी गायकवाड यांना वारी शिवारात एक इसम तलवार बाळगून गावात फिरत असल्याची गोपनीय माहिती मिळाली. त्यानुसार त्यांनी पोलीस पथकाला तातडीने कारवाई करण्याच्या सूचना दिल्या. पोलीस पथकाने वारी गावात शोध घेतला असता स्मशानभूमीच्या गेटसमोर एक इसम संशयास्पदरीत्या फिरताना आढळून आला. त्याची दोन पंचांसमक्ष अंगझडती घेतली असता त्याच्याकडे सुमारे २४.५ इंच लांबीची तलवार आढळून आली. पोलिसांनी सदर तलवार पंचांसमक्ष जप्त केली.
याप्रकरणी शिवाजी दादू कोतकर याच्याविरुद्ध कोपरगाव तालुका पोलीस स्टेशनमध्ये गुन्हा क्रमांक ५२२/२०२६, आर्म अॅक्ट कलम ४/२५ अन्वये गुन्हा दाखल करण्यात आला असून, पुढील तपास पोलीस करीत आहेत.
ही कारवाई पोलीस अधीक्षक मुम्मका सुदर्शन, अपर पोलीस अधीक्षक सोमनाथ वाकचौरे, उपविभागीय पोलीस अधिकारी अमोल भारती यांच्या मार्गदर्शनाखाली पोलीस निरीक्षक संभाजी गायकवाड यांच्या नेतृत्वाखाली करण्यात आली. या कारवाईत पोलीस कर्मचारी रघुनाथ कारखले, अंबादास वाघ, नवनाथ गुंजाळ, राम खरातोडे, रशिद शेख व चालक नवनाथ जाधव यांनी सहभाग घेतला.


