कोपरगाव प्रतिनिधी
ज्याप्रमाणे सर्व समाज दिव्यांगाकडे सहानुभूतीने पाहतो, त्यांना मदत करण्यासाठी पुढे येतो. त्याप्रमाणे सर्व समाजाने विधवा महिलांच्या बाबतीत देखील हीच भूमिका घेवून विधवा महिलांना देखील सन्मानाची वागणूक दिली पाहिजे असे प्रतिपादन श्री साईबाबा संस्थानच्या विश्वस्त मंडळाचे अध्यक्ष ना. आशुतोष काळे यांनी केले.
कोपरगाव शहरातील ३०२ दिव्यांग लाभार्थ्यांना दिव्यांग सन्मान व ५% अनुदान अंतर्गत ७ लक्ष २७ हजार २०० रुपये अनुदानाचे धनादेश नुकतेच ना.आशुतोष काळे यांच्या हस्ते प्रदान करण्यात आले याप्रसंगी ते बोलत होते. ते पुढे म्हणाले की, निसर्गाने अन्याय केल्यामुळे दिव्यांग बांधवांचे जीवन सुसह्य व्हावे यासाठी शासनाकडून विविध योजना राबविल्या जात आहेत त्यामुळे त्यांना येणाऱ्या अडचणी काहीशा कमी झाल्या आहेत. परंतु समाजात दिव्यांगाप्रमाणे विधवा महिलांचा प्रश्न देखील मोठा अडचणींचा आहे. आजही ग्रामीण भागात विधवांबाबत अनेक अनिष्ट रूढी, प्रथा कायम आहेत त्यामुळे सुखाच्या, आनंदाच्या कार्यक्रमात विधवा महिलांना सहभागी होता येत नाही.एकाबाजूला समाज शिक्षित होऊन प्रगती साधत आहे मात्र दुसऱ्या बाजूला विधवांच्या बाबत आजही अनिष्ट प्रथांचे जतन केले जात आहे हे भीषण वास्तव आहे. या अनिष्ठ प्रथांमुळे महिलांचा सन्मान हिरावून घेतला जात आहे. त्यामुळे या अनिष्ट प्रथांवर गावागांवातून प्रहार करण्याची खरी गरज असून विधवांना सन्मानाची वागणूक देण्याचा पुरोगामी विचारांची जपवणूक करणे हि काळाची गरज आहे. त्यासाठी समाजाकडून दिव्यांगांना दाखविली जाणारी सहानुभूती, त्यांना दिला जाणारा सन्मान व अशीच सहानुभूती आणि असाच सन्मान विधवांना देखील देण्यासाठी समाजाने पुढाकार घ्यावा असे आवाहन ना. आशुतोष काळे यांनी यावेळी केले.
यावेळी मुख्याधिकारी शांताराम गोसावी,पुरवठा अधिकारी दीपक भिंगारदिवे, राष्ट्रवादी काँग्रेसचे शहराध्यक्ष सुनील गंगूले, माजी नगरसेवक गटनेते विरेन बोरावके, मंदार पहाडे,संदीप पगारे, हाजी मेहमूद सय्यद, रमेश गवळी, फकीर कुरेशी, राष्ट्रवादी युवकचे शहराध्यक्ष नवाज कुरेशी, सामाजिक कार्यकर्ते डुकरे, लहू वाघमारे, योगेश गंगवाल,बाळासाहेब कडू, रविंद्र भुजाडे, धनंजय कहार,आकाश डागा, एकनाथ गंगूले, राजेंद्र आभाळे,मुकुंद इंगळे, राजेंद्र फुलफगर, अक्षय आंग्रे,गणेश बोरुडे आदींसह दिव्यांग बांधव तसेच नगरपरिषदेचे अधिकारी व कर्मचारी उपस्थित होते. दिव्यांग लाभार्थ्यांना दिव्यांग सन्मान व ५% अनुदान अंतर्गत धनादेश वितरण प्रसंगी ना.आशुतोष काळे.
