कोपरगाव प्रतिनिधी
कोपरगाव शहर, आजूबाजूचा परिसर व इतर ठिकाणाहून चोरी करणारे दोन आरोपींना कोपरगाव शहर पोलिसांनी जेरबंद करून त्यांच्या कडून चोरी केलेल्या
८ लाख ३० हजार रुपये किमतीच्या २० मोटर सायकल हस्तगत करत धडाकेबाज कामगिरी केली आहे. पोलिसांच्या या कारवाईचे सर्वत्र कौतुक होत आहे.
याबाबत सविस्तर वृत्त असे की दि १९ मे २०२२ रोजी कोपरगाव बेट येथील फिर्यादी किशोर निवृत्ती दिघे यांनी त्यांचे मालकीची हिरो होंडा स्प्लेंडर मोटर सायकल क्र.एम एच १५ सीयू ९१८० ही दि १३ मे २०२२ रोजी रात्री त्यांचे राहत्या घरासमोरून अज्ञात इसमाने चोरून नेल्याची फिर्याद कोपरगाव शहर पोलीस स्टेशनला दिली होती. त्यानुसार पोलिसांनी भादवि कलम ३७९ प्रमाणे गुन्ह्याची आपले दप्तरी नोंद केली होती. त्या अनुषंगाने पोलीस निरिक्षक वासुदेव देसले यांनी हेड कॉन्स्टेबल पुंड पोलीस कॉन्स्टेबल तमनर, शिंदे, खारतोडे, काकडे यांचे एक पथक तयार करून नाकाबंदी करत असतानाच एक इसम गोविंद संजय शिंदे यांचेकडे चोरीची मोटरसायकल असल्याची गुप्त माहिती देसले यांना मिळाली. सदर इसम कोपरगाव बेट नाका येथे थांबलेला असल्याचे समजले त्यानुसार त्या ठिकाणी जाऊन विचारपूस करून सदर इसमास ताब्यात घेऊन विचारपूस केली असता त्याच्याकडे असलेली मोटर सायकल त्याचे मालकीची नसून ती शहर पोलीस स्टेशनला दाखल गुन्ह्यांतील चोरी गेलेली मोटारसायकल असल्याचे निष्पन्न झाले. सदर आरोपीस विश्वासात घेऊन अजून विचारपूस केली असता त्याचा अजून एक जोडीदार आशिष राम मिलन कोहरी वय २० वर्षे राहणार पुणतांबा चौफुली कोपरगाव मूळ राहणार जगदीशपूर अमेठी उत्तर प्रदेश हा सापडला असून त्यास अटक करण्यात आली आहे व त्यांचेकडून विविध ठिकाणाहून चोरी केलेल्या २० मोटर सायकल हस्तगत केल्या आहेत.
अजून एक आरोपी नाना पानसरे हा फरार आहे त्याचा पोलीस शोध घेत असून पुढील तपास पोलीस निरिक्षक वासुदेव देसले यांचे मार्गदर्शनाखाली पोलीस हेड कॉन्स्टेबल आर.पी. पुंड हे करत आहेत.
