कोपरगाव प्रतिनिधी
माझा गाव, माझी जबाबदारी’ या उपक्रमातून गावाच्या स्वच्छतेची जबाबदारी पार पाडताना विद्यार्थ्यांच्या सर्वांगीण विकासासाठीही पुढाकार घेत कुंभारी येथील उमंग युवा शक्ती प्रतिष्ठानने गुरुवर्य तुकारामबाबा विद्यालयातील विद्यार्थ्यांना तबला, पेटी व टाळ ही वाद्ये भेट दिली. या उपक्रमामुळे विद्यार्थ्यांच्या कलागुणांना वाव मिळण्यासोबतच विद्यालयात भक्तिमय व उत्साहपूर्ण वातावरण निर्माण झाले.
विद्यार्थ्यांना केवळ पुस्तकी शिक्षण न देता संगीत, कला व सांस्कृतिक क्षेत्रातील त्यांच्या सुप्त गुणांना व्यासपीठ मिळावे, या उद्देशाने हा उपक्रम राबविण्यात आला. वाद्ये उपलब्ध झाल्याने विद्यार्थ्यांमध्ये उत्साहाचे वातावरण निर्माण झाले असून, विविध सांस्कृतिक व भक्तिमय कार्यक्रमांसाठी त्याचा उपयोग होणार आहे.
उमंग युवा शक्ती प्रतिष्ठानच्या ‘माझा गाव, माझी जबाबदारी’ या स्वच्छता अभियानाचा येत्या रविवारी १५० वा रविवार पूर्ण होत आहे. गेल्या अनेक रविवारपासून प्रतिष्ठानचे युवक श्रमदानातून गावातील स्वच्छता, सार्वजनिक ठिकाणांची निगा आणि सामाजिक बांधिलकी जपत आहेत. स्वच्छतेसोबतच शिक्षण, कला आणि विद्यार्थ्यांच्या सर्वांगीण विकासालाही प्रतिष्ठानने प्राधान्य दिले आहे.
‘स्वच्छ गावासोबतच सक्षम, संस्कारी आणि गुणवंत पिढी घडविणे हीदेखील आपली जबाबदारी आहे,’ या भावनेतून भविष्यातही शिक्षण व सामाजिक क्षेत्रात विविध उपक्रम राबविण्याचा निर्धार प्रतिष्ठानच्या सदस्यांनी व्यक्त केला.
यावेळी विद्यालयाच्या प्रभारी मुख्याध्यापिका श्रीमती गीते के. एम. मॅडम तसेच गुणवत्ता कक्षा प्रमुख श्रीमती रणशूर वाय. एम. मॅडम यांच्याकडे वाद्ये सुपूर्त करण्यात आली. यावेळी उपक्रमशील शिक्षक चिंधे एस. ए. सर, दवंगे सी. के. सर, वसावे ए. एस. सर, डोळस एस. एस. सर, सौ. शेख एस. आय. मॅडम, श्रीमती खैरनार आर. व्ही. मॅडम, श्रीमती साबळे एस. आर. मॅडम, श्रीमती साळवे आर. एम. मॅडम, श्रीमती चोपडा एस. एन. मॅडम यांच्यासह विद्यालयातील शिक्षक-शिक्षिका व शिक्षकेतर कर्मचारी उपस्थित होते.
