कोपरगाव प्रतिनिधी
रिझर्व्ह बँक व शासनाच्या नियमांचे काटेकोर पालन, कर्जवाटपातील पारदर्शकता आणि प्रभावी कर्जवसुलीच्या बळावर गौतम सहकारी बँकेने सहकार क्षेत्रात आपली वेगळी ओळख निर्माण केली आहे. सन २०२५-२६ अखेर बँकेच्या ठेवी १४८ कोटी रुपये होत्या. त्यामध्ये सातत्याने वाढ होऊन आजमितीस बँकेच्या ठेवी १७५ कोटी रुपयांपर्यंत पोहोचल्या आहेत. सभासदांचा बँकेवरील विश्वास दिवसेंदिवस दृढ होत असल्याचे हे द्योतक असून, एवढ्या ठेवींवर एवढा नफा कमावणारी गौतम सहकारी बँकेसारखी दुसरी बँक महाराष्ट्रात नाही, असे गौरवोद्गार आमदार आशुतोष काळे यांनी काढले.
सहकारी बँकिंग क्षेत्रात अग्रगण्य असलेल्या गौतम सहकारी बँकेची सन २०२५-२६ या आर्थिक वर्षाची ५१ वी वार्षिक सर्वसाधारण सभा शनिवार (दि.८) रोजी गौतमनगर येथील बँकेच्या मुख्य कार्यालयातील सभागृहात खेळीमेळीच्या वातावरणात पार पडली. बँकेचे मार्गदर्शक तथा माजी आमदार अशोकराव काळे आणि आमदार आशुतोष काळे यांच्या प्रमुख उपस्थितीत झालेल्या या सभेच्या अध्यक्षस्थानी बँकेचे चेअरमन संजय आगवण होते.यावेळी सभासदांना मार्गदर्शन करताना आमदार आशुतोष काळे बोलत होते.गौतम सहकारी बँकेचे कार्यक्षेत्र अहमदनगर, नाशिक, ठाणे, पुणे व संभाजीनगर आदी जिल्ह्यांमध्ये असून, नऊ शाखांच्या माध्यमातून छोट्या-मोठ्या व्यावसायिकांसह विविध घटकांच्या आर्थिक गरजा वेळेत पूर्ण करण्याचे काम बँक करीत आहे. आवश्यक कागदपत्रांची योग्य पडताळणी करूनच कर्जवाटप करण्याची पद्धत तसेच कर्जवसुलीवर असलेले विशेष लक्ष यामुळे बँकेचे आर्थिक कामकाज सक्षमपणे सुरू आहे. यावेळी बोलताना आमदार आशुतोष काळे म्हणाले की, मा. खासदार कर्मवीर शंकररावजी काळे साहेबांनी सहकाराची मुहूर्तमेढ रोवून उभ्या केलेल्या सहकारी संस्थांना प्रगतीपथावर नेण्याचे आणि त्यांना नावारूपाला आणण्याचे काम केले. त्यानंतर या सर्व संस्था यशाच्या शिखरावर नेण्याचे काम माजी आमदार अशोकराव काळे यांनी केले असून आजही त्यांच्या मार्गदर्शनाखाली सर्व सहकारी संस्था उत्तम पद्धतीने सुरू आहेत.गौतम बँकेची स्पर्धा खासगी बँकांशी आहे. खासगी बँकांच्या बरोबरीने आपल्या ग्राहकांना सर्व प्रकारच्या आधुनिक सेवा-सुविधा देण्याचा प्रयत्न बँक करीत आहे. खासगी बँकांकडे ग्राहक असतात; मात्र आपल्या बँकेशी सभासदांचे केवळ ग्राहक म्हणून नव्हे, तर आपुलकीचे आणि विश्वासाचे नाते आहे. त्यामुळे सभासदांनी बँकेवर ठेवलेला विश्वास जपणे ही सर्वांची जबाबदारी आहे. बँकेने घालून दिलेल्या शिस्तीचे काटेकोरपणे पालन करताना आधुनिक तंत्रज्ञानाचा प्रभावी वापर आणि सहकाराची मूल्ये यांची सांगड घालून गौतम सहकारी बँकेला आणखी प्रगतीच्या उंचीवर घेऊन जा, असा मौलिक सल्लाही आमदार आशुतोष काळे यांनी दिला.प्रास्तविक करतांना प्रशासकीय अधिकारी बापूसाहेब घेमुड यांनी बँकेच्या आर्थिक परिस्थितीचा अहवाल उपस्थित सभासदांसमोर मांडतांना सांगितले की, आरबीआयचे कडक नियम, वाढती स्पर्धा आणि आर्थिक आव्हानांना सामोरे जात गौतम बँकेने यावर्षी ऐतिहासिक आणि भक्कम कामगिरी केली आहे. सर्व वित्तीय निकषांचे पालन करून व्यवसायात नवा टप्पा गाठत मिश्र व्यवसाय २०४ कोटीहून २३८ कोटीवर गेला आहे. बँकेकडे १४८ कोटीच्या ठेवी व कर्ज येणे ८९ कोटी ५६ लाख असून बँकेला यावर्षी ढोबळ नफा ०४ कोटी १४ लाख ०६ हजार झालेला आहे. त्यातून सर्व कायदेशीर तरतुदींची पूर्तता करून निव्वळ नफा ०१ कोटी ३५ लाख ४८ हजार झाला आहे. तसेच मागील काही वर्षापासून बँकेचा निव्वळ एनपीए ०% असल्याचे सांगितले. संस्थेचे मार्गदर्श मा.आमदार अशोकराव काळे व आमदार आशुतोष काळे यांच्या मार्गदर्शनाखाली सर्व महामंडळाच्या माध्यमातून समाजातील गरजू, पात्र व कर्जफेड करणाऱ्या व्यक्तीना सर्व आवश्यक कागदपत्रांची पडताळणी व पूर्तता केल्याशिवाय कर्ज देत नाही. सर्व नियमांचे पालन केले जात असल्यामुळे ठेवीमध्ये देखील वाढ होत असून उत्कृष्ठ व्यवस्थापन आणि शिस्तबद्ध कारभाराच्या जोरावर बँकेच्या नफ्यात वाढ होत असल्याचे त्यांनी सांगितले.
सभेच्या अध्यक्षपदाची सुचना राजेंद्र ढोमसे यांनी मांडली त्यास भागीनाथ काळे यांनी अनुमोदन दिले. यावेळी आर्थिक वर्ष २०२५-२६ या आर्थिक वर्षात निधन झालेल्या व्यक्तींना श्रद्धांजलीचा ठराव संचालक दत्तात्रय खेमनर यांनी मांडला.बँकेचे मुख्य कार्यकारी अधिकारी प्रवीण पावडे यांनी विषय पत्रिकेवरील १ ते १६ विषय मांडले त्यास सभासदांनी टाळ्यांच्या गजरात एकमताने मंजुरी दिली. याप्रसंगी कर्मवीर शंकरराव काळे सहकारी साखर कारखान्याचे व्हा.चेअरमन प्रवीण शिंदे, संचालक दिलीपराव बोरनारे, सुधाकर रोहोम,सूर्यभान कोळपे, श्रीराम राजेभोसले, डॉ.मच्छिंद्र बर्डे, प्रशांत घुले, सुनील मांजरे, शंकरराव चव्हाण, मनोज जगझाप, दिनार कुदळे, श्रावण आसने, तसेच ज्येष्ठ नेते कारभारी आगवण, विश्वासराव आहेर,ज्ञानदेव मांजरे, बाबासाहेब कोते, सोमनाथ चांदगुडे, सुभाष गाडे, शरद पवार पतसंस्थेचे चेअरमन देवेंद्र रोहमारे, गौतम सहकारी कुक्कुट पालनचे चेअरमन विजय कुलकर्णी, बँकेचे व्हा.चेअरमन विजयराव रक्ताटे, सर्व संचालक मंडळ, व्यवस्थापन मंडळ सदस्य, मुख्य कार्यकारी अधिकारी प्रवीण पावडे, प्रशासकीय अधिकारी बापूसाहेब घेमुड, कर्मवीर शंकरराव काळे कारखान्याचे कार्यकारी संचालक सोमनाथ बोरनारे, जनरल मॅनेजर सुनील कोल्हे, पद्मविभूषण शरदचंद्रजी पवार साहेब पतसंस्थेचे मॅनेजर मंगेश देशमुख, गौतम सहकारी कुक्कुट पालनचे मॅनेजर सुरेश पेटकर, गोदावरी खोरे केन ट्रान्सपोर्टचे कार्यकारी संचालक दौलतराव मोरे, आदी मान्यवर उपस्थित होते.विषयपत्रिका वाचन, मुख्य कार्यकारी अधिकारी प्रवीण पावडे, प्रास्तविक प्रशासकीय अधिकारी बापूसाहेब घेमुड यांनी केले. सभेचे सूत्रसंचालन वैभव महाजन यांनी केले तर आभार बँकेचे चेअरमन संजय आगवन यांनी मानले.
गौतम सहकारी बँकेच्या ५१ व्या वार्षिक सर्वसाधारण सभेत सभासदांना मार्गदर्शन करतांना आ.आशुतोष काळे समवेत मार्गदर्शक माजी आमदार अशोकराव काळे, बँकेचे चेअरमन संजय आगवन व मान्यवर.
