जेऊर कुंभारी वार्ताहर
कोपरगाव तालुक्यातील अग्रगण्य जोगेश्वरी इंटरनॅशनल स्कूलमध्ये शनिवारी जागतिक योग दिन मोठ्या उत्साहात साजरा करण्यात आला. यावेळी जिजाई बहुउद्देशीय शैक्षणिक संस्थेचे सचिव सुनील होन, संचालक सागर होन आणि योग प्रशिक्षक श्री. कानडे हे प्रमुख पाहुणे म्हणून उपस्थित होते.
कार्यक्रमाची सुरुवात भारतीय संस्कृतीचे प्रतीक असलेल्या सरस्वती पूजनाने करण्यात आली. यावेळी सचिव सुनील होन, संचालक सागर होन, योग प्रशिक्षक कानडे सर तसेच प्राचार्या ज्योती खरात यांच्या हस्ते सरस्वती मातेच्या प्रतिमेचे पूजन करण्यात आले.
योग प्रशिक्षक श्री. कानडे यांनी विद्यार्थ्यांना विविध व्यायामप्रकार व योगासने प्रात्यक्षिकासह करून दाखविले. विद्यार्थ्यांनीही उत्स्फूर्तपणे सहभाग नोंदवत विविध योगप्रकार सादर केले. योगामुळे शरीर व मन यामध्ये संतुलन निर्माण होऊन सकारात्मक ऊर्जा व विचारसरणी विकसित होते, असे प्रतिपादन प्राचार्या ज्योती खरात यांनी केले.
यावेळी विद्यार्थ्यांसह शिक्षक व शिक्षकेत्तर कर्मचाऱ्यांनी विविध योगासने आणि प्राणायाम प्रकारांचा सराव केला. शाळेतील विद्यार्थिनींनी ताडासन, वृक्षासन, वज्रासन यांसह भ्रामरी व भस्त्रिका प्राणायामाचे सादरीकरण केले. तसेच इयत्ता सातवी ते नववीच्या विद्यार्थिनींनी योगा अॅक्टिव्हिटी सादर करून योगाचे महत्त्व प्रभावीपणे सर्वांपर्यंत पोहोचविले.या प्रसंगी अश्विनी होन, पल्लवी होन, स्वाती वक्ते, स्नेहल होन, मीनल बोरावके, कविता लिंभूरे, रुपाली चव्हाण, रेश्मा जावळे, कांचन जाधव, दिलीप शिंदे, वैशाली गुंजाळ, संजना बोरावके आदी शिक्षक तसेच मुक्ता तुवर, रेणुका साळुंखे, सादिक सय्यद, शिवाजी जाधव, सोमनाथ पवार, साई पवार, अमोल कदम आदी शिक्षकेत्तर कर्मचारी उपस्थित होते.
कार्यक्रमाच्या यशस्वीतेसाठी सर्व शिक्षक, शिक्षकेत्तर कर्मचारी व विद्यार्थ्यांनी परिश्रम घेतले.
कार्यक्रमाचे सूत्रसंचालन शीतल होन यांनी केले, तर आभार प्रदर्शन सायली बोरावके यांनी केले.
