आधुनिक शेती तंत्रज्ञान व मनरेगा अंतर्गत फळबाग लागवडीची केली पाहणी!!
जेऊर कुंभारी वार्ताहर
जेऊर कुंभारी येथील प्रगतिशील शेतकरी योगेश मधुकर वक्ते यांच्या डाळिंब बागेस अहिल्यानगरचे जिल्हाधिकारी डॉ. पंकज आशिया यांनी भेट देऊन पाहणी केली. यावेळी त्यांनी आधुनिक डाळिंब लागवड तंत्रज्ञान, एक खोड पद्धती, पीक व्यवस्थापन आणि उत्पादनवाढीसाठी राबविण्यात येणाऱ्या विविध प्रयोगांची माहिती जाणून घेतली.
जिल्हाधिकारी डॉ. आशिया यांनी डाळिंब बागेची प्रत्यक्ष पाहणी करत एक खोड तंत्रज्ञानाची संकल्पना, त्याचा वापर आणि डाळिंब पिकाच्या व्यवस्थापनातील बारकावे समजून घेतले. आधुनिक तंत्रज्ञानाच्या माध्यमातून बागेची वाढ व उत्पादनक्षमता सुधारण्यासाठी करण्यात येणाऱ्या उपाययोजनांबाबत त्यांनी शेतकरी योगेश वक्ते यांच्याशी चर्चा केली.
महात्मा गांधी राष्ट्रीय ग्रामीण रोजगार हमी योजना मनरेगा अंतर्गत प्राप्त निधीचा डाळिंब बागेच्या विकासासाठी करण्यात आलेला उपयोग, तसेच शासकीय योजनांच्या माध्यमातून फळबाग लागवडीसाठी करण्यात आलेल्या कामांचीही जिल्हाधिकारी यांनी माहिती घेतली.
यावेळी योगेश वक्ते यांनी डाळिंब लागवडीतील आपले अनुभव आणि नाविन्यपूर्ण प्रयोगांची माहिती दिली. योग्य लागवड पद्धती, आधुनिक तंत्रज्ञान, काटेकोर पीक व्यवस्थापन व नियोजनाचा अवलंब केल्यास लागवडीनंतर एका वर्षाच्या आत फळधारणेची क्षमता प्राप्त होऊ शकते, तसेच सुमारे १८ महिन्यांत पहिली काढणी घेणे शक्य होऊ शकते, असे त्यांनी सांगितले.
डाळिंब शेतीतील रोग-किडींचे व्यवस्थापन, उत्पादनातील आव्हाने आणि त्यावरील उपाययोजनांबाबतही यावेळी चर्चा झाली. शासकीय योजनांचा प्रभावी वापर आणि आधुनिक तंत्रज्ञानाच्या साहाय्याने शेती विकासासाठी सुरू असलेल्या प्रयत्नांची जिल्हाधिकारी यांनी पाहणी केली.
यावेळी उपविभागीय अधिकारी माणिक आहेर, तहसीलदार महेश सावंत,जिल्हा अधीक्षक कृषी अधिकारी सुधाकर बोऱ्हाडे, तालुका कृषी अधिकारी मनोज सोनवणे, माजी सभापती शिवाजी वक्ते, संचालक मधुकर वक्ते, गोदावरी खोरे केन ट्रान्सपोर्ट संचालक दिलीपराव शिंदे,
संचालक सतीशराव आहाड, प्रगतिशील शेतकरी योगेश वक्ते, भाऊसाहेब वक्ते ग्रमविकास अधिकारी संजय दुशिंग, सहाय्यक कृषी अधिकारी तसेच ग्रामस्थ उपस्थित होते.
उपस्थितीतांचे आभार संचालक मधुकर वक्ते यांनी मानले.
