विद्यार्थ्यांना स्कूल बॅगचे वाटप,शिक्षणाला प्रोत्साहन देण्याचा उपक्रम
कोपरगाव प्रतिनिधी
वाढदिवसाचा आनंद केवळ उत्सव आणि औपचारिक कार्यक्रमांपुरता मर्यादित न ठेवता, समाजाच्या उपयोगी पडणाऱ्या उपक्रमातून साजरा करण्याची परंपरा जोपासत नगराध्यक्ष पराग संधान यांचा वाढदिवस विद्यार्थ्यांसोबत सामाजिक उपक्रम राबवून साजरा करण्यात आला. पराग संधान मित्र मंडळाच्या वतीने मा. माधवरावजी कचेश्वर आढाव माध्यमिक व तांत्रिक विद्यालय, कोपरगाव येथे विद्यार्थ्यांना शैक्षणिक साहित्य म्हणून स्कूल बॅगचे वाटप करण्यात आले.
वाढदिवसानिमित्त आयोजित या उपक्रमातून विद्यार्थ्यांच्या शिक्षणाच्या प्रवासाला हातभार लावण्याचा प्रयत्न करण्यात आला. शालेय जीवनात विद्यार्थ्यांना आवश्यक असणारे साहित्य उपलब्ध करून देण्यासोबतच शिक्षणाबद्दल सकारात्मक वातावरण निर्माण करणे आणि विद्यार्थ्यांना प्रोत्साहन देणे, हा या उपक्रमामागील प्रमुख उद्देश होता. विद्यार्थ्यांच्या चेहऱ्यावर उमटलेला आनंद आणि त्यांच्या शिक्षणासाठी मिळणारे प्रोत्साहन हीच वाढदिवसाची खरी भेट असल्याची भावना यावेळी व्यक्त करण्यात आली. कोल्हे कुटुंबाची सामाजिक कार्याची शिकवण माझ्या कामाची प्रेरणा आहे. बिपीनदादा कोल्हे यांच्या वाढदिवसाला शैक्षणिक साहित्य वाटप अनेक वर्षापासून केले जाते त्याचप्रमाणे स्नेहलताताई कोल्हे आणि आ.विवेकभैय्या कोल्हे यांची सातत्याने समाजाप्रती असणारी जाणीव विविध सामाजिक उपक्रम राबवण्यासाठी आम्हाला प्रेरणा देते अशी प्रतिक्रिया नगराध्यक्ष पराग संधान यांनी व्यक्त केली.
वाढदिवसानिमित्त होणारा प्रत्येक उपक्रम हा केवळ औपचारिक न राहता समाजाच्या उपयोगी पडणारा आणि एखाद्याच्या भविष्यात सकारात्मक बदल घडविणारा असावा, ही भूमिका या उपक्रमातून अधोरेखित झाली. समाजातील गरजू घटक, विद्यार्थी आणि युवकांच्या विकासासाठी अशा उपक्रमांना सातत्याने प्रोत्साहन मिळणे आवश्यक आहे. शिक्षणाच्या माध्यमातून सक्षम पिढी घडविण्यासाठी समाजातील प्रत्येक घटकाने आपापल्या परीने योगदान देणे गरजेचे असल्याचे यावेळी सांगण्यात आले.
या प्रसंगी विजयराव आढाव, मनोज अग्रवाल, संजनाताई उदावंत, प्रसाद आढाव, स्वप्नील मंजुळ, हारुणभाई, रियाज सर, सतीश काकडे, रावसाहेब साठे, कलविंदर दडियाल, रोहित कनगरे, दादा नाईकवाडे, शैलेश नागरे, अशोक वराट, समाधान कुऱ्हे, मनोज इंगळे, शुभम सोनवणे, गौरव आढाव, दुर्गेश गवळी, कृष्णा पडियार, अभिषेक मंजुळ,तोहिद कच्छी, संजय खरोटे, आनंद मोरस्कर, संजय उदावंत,रोहीत एरंडे, यांच्यासह इतर सहकारी उपस्थित होते.विद्यार्थ्यांना शैक्षणिक साहित्याचे वाटप करून सामाजिक बांधिलकी जपत वाढदिवस साजरा करण्याच्या या उपक्रमाचे उपस्थितांकडून स्वागत करण्यात आले.
