कोपरगाव नगरपरिषदेच्या ढिसाळ कारभाराचा नगरसेवक बाळासाहेब रुईकर यांनी केला निषेध!!
कोपरगाव प्रतिनिधी
कोपरगाव शहरातील बाजारतळ परिसरात कोपरगाव नगरपरिषदेने जनावरांचा कोंडवाडा सुरु केला असून या कोंडवाड्यात प्रशासनाच्या अनास्थेमुळे एका आजारी गाईची अत्यंत बिकट अवस्था झाली असून ती तडफडत असल्याचे निदर्शनास आले आहे. या घटनेची माहिती मिळताच राष्ट्रवादी काँग्रेसचे नगरसेवक बाळासाहेब रुईकर यांनी तत्काळ घटनास्थळी धाव घेऊन तातडीने डॉक्टरांना बोलावून गाईची तपासणी केली. गाईची अवस्था अत्यंत गंभीर असून या कोंडवाड्यात चारा पाण्याची कोणतीही सोय नसल्याचे आढळून आले. त्यामुळे संतप्त झालेल्या नगरसेवक बाळासाहेब रुईकर यांनी मुक्या जनावरांचा तळतळाट घेऊ नका अशी विनंती कोपरगाव नगरपरिषद प्रशासनाला व सत्ताधाऱ्यांना केली आहे.
बाजार तळावरील पालिकेच्या कोंडवाड्यात एक गाय गंभीर जखमी व आजारी अवस्थेत पडून असल्याने या गाईची परिस्थिती अत्यंत चिंताजनक आहे. यापूर्वी या कोंडवाड्यात दोन गाईंचा मृत्यू झाल्याची घटना घडली आहे. नगरसेवक बाळासाहेब रुईकर यांनी या कोंडवाड्याची पाहणी केली असता या कोंडवाड्यात चारा आणि जनावरांच्या पिण्याच्या पाण्याची कोणतीही योग्य व्यवस्था नसल्याचे दिसून आले. पिण्यासाठी ठेवलेले पाणी अत्यंत घाण होते तर जनावराला पाणी पाजण्यासाठी साधी बादलीही उपलब्ध नाही. पालिकेने शहरातून अनेक मोकाट जनावरे पकडल्याचा दावा केला होता मात्र कोंडवाड्यात केवळ एकच गाय आढळून आल्याने उर्वरित जनावरे नेमकी कुठे गेली असा सवाल नगरसेवक बाळासाहेब रुईकर यांनी उपस्थित केला.गेल्या अनेक दिवसांपासून ही गाय पडून असल्याने तिची प्रकृती चिंताजनक बनली आहे. तिला उभं करण्यासाठी लागणाऱ्या पाळणा सारख्या आवश्यक सुविधा पालिकेने उपलब्ध केल्या नसल्याने उपचारावर मर्यादा येत आहे. पालिका कोंडवाड्यात आजारी जनावरांची अशी दुरावस्था होत असल्याने नागरिकांमधून तीव्र संताप व्यक्त होत आहे. या गाईच्या उपचारासाठी पालिका प्रशासनाने ठोस पावले उचलावी आणि मोकाट जनावरांच्या प्रश्नावर कायमस्वरूपी उपाययोजना कराव्या असे राष्ट्रवादी काँग्रेसचे नगरसेवक बाळासाहेब रुईकर यांनी नगरपरिषद प्रशासनाला सांगितले आहे.
