जेऊर कुंभारी वार्ताहर
सहकार महर्षी शंकरराव कोल्हे यांच्या स्मरणार्थ आणि संजवनी युवा प्रतिष्ठानच्या मार्गदर्शनाखाली सुरू असलेल्या आरोग्यसेवा उपक्रमांतर्गत जेऊर कुंभारी येथील संजयनगर परिसरात ‘फिरता दवाखाना’ उपक्रम राबविण्यात आला. या उपक्रमाला ग्रामस्थांचा उत्स्फूर्त प्रतिसाद मिळाला असून, तब्बल २०० नागरिकांची मोफत आरोग्य तपासणी करण्यात आली.
डॉ. सोनवणे यांच्या मार्गदर्शनाखाली नागरिकांची विविध आजारांसंदर्भात तपासणी करण्यात आली. तपासणीनंतर आवश्यकतेनुसार रुग्णांना मोफत औषधांचे वाटप करण्यात आले. गावातच आरोग्य तपासणी व औषधोपचाराची सुविधा उपलब्ध झाल्याने नागरिकांनी समाधान व्यक्त केले.
आमदार विवेक कोल्हे यांच्या संकल्पनेतून संपूर्ण कोपरगाव तालुक्यात ‘आरोग्यसेवा गावाच्या दारी’ पोहोचविण्याचा उपक्रम राबविण्यात येत आहे. आर्थिक परिस्थिती, आरोग्य केंद्रापासूनचे अंतर अथवा अन्य कारणांमुळे उपचारापासून वंचित राहणाऱ्या गोरगरीब व गरजू नागरिकांसाठी हा फिरता दवाखाना उपयुक्त ठरत आहे. ग्रामीण भागातील नागरिकांना वेळेत आरोग्य तपासणी तसेच आवश्यक औषधे उपलब्ध करून देण्याचे काम या माध्यमातून होत आहे.
या वेळी महर्षी शंकरराव कोल्हे सहकारी साखर कारखान्याचे संचालक बाळासाहेब वक्ते, माजी सभापती शिवाजीराव वक्ते ,संचालक सतीश आव्हाड, माजी उपसरपंच जालिंदर चव्हाण, माजी सरपंच यशवंतराव आव्हाड, पांडुरंग वक्ते, संजय शांतीलाल वक्ते,विजय मधुकर वक्ते मान्यवर उपस्थित होते.
