Friday, November 20, 2026
Google search engine
HomeUncategorizedएन.एच.७५२ जी कोपरगाव हद्दीत मंजुरीनुसार चौपदरीच करा!आमदार आशुतोष काळेंची केंद्रीय मंत्री नितीन...

एन.एच.७५२ जी कोपरगाव हद्दीत मंजुरीनुसार चौपदरीच करा!आमदार आशुतोष काळेंची केंद्रीय मंत्री नितीन गडकरींकडे मागणी!!

कोपरगाव प्रतिनिधी

भविष्यातील २०५० पर्यंतची संभाव्य वाहतूकवाढ विचारात घेऊन कोपरगाव-येवला-मनमाड-मालेगाव या ७६ किलोमीटर लांबी असलेल्या राष्ट्रीय महामार्गाच्या सिमेंट काँक्रिटीकरणासाठी केंद्रीय रस्ते वाहतूक व महामार्ग मंत्री ना. नितीनजी गडकरी यांच्या माध्यमातून ९८० कोटी रुपयांचा निधी मंजूर झाला आहे. मात्र, कोपरगाव तालुक्याच्या हद्दीत हा महामार्ग पूर्वीच्या मंजुरीनुसार चौपदरीच करण्यात यावा अशी मागणी आमदार आशुतोष काळे यांनी केंद्रीय मंत्री नितीनजी गडकरी यांच्याकडे लेखी निवेदनाद्वारे केली आहे.
दिलेल्या निवेदनात आमदार आशुतोष काळे यांनी पुढे असे म्हटले आहे की, नाशिक, छत्रपती संभाजीनगर, अहिल्यानगर, पुणे आणि मालेगाव या प्रमुख शहरांना जोडणारा एन.एच.७५२ जी हा महत्त्वाचा राष्ट्रीय महामार्ग आहे. मालेगावकडून मनमाड, येवला मार्गे कोपरगावकडे येणाऱ्या या महामार्गावर मोठ्या प्रमाणात वाहतूक असली, तरी त्याच्या चौपदरीकरणालाच यापूर्वी मंजुरी देण्यात आलेली आहे. मात्र, आता हा महामार्ग चौपदरीऐवजी सहापदरी करण्याच्या चर्चा ऐकायला मिळत आहे.
कोपरगाव तालुक्याच्या हद्दीत हा महामार्ग सहापदरी झाल्यास महामार्गालगत स्वतःच्या जागेत हॉटेल, गॅरेज, व्यावसायिक आस्थापना तसेच बिगरशेती प्लॉट विकसित केलेल्या व्यावसायिकांचे मोठे नुकसान होण्याची शक्यता आहे. याशिवाय महामार्गालगत असलेल्या शाळा-महाविद्यालये, दूध संघ आणि विविध शैक्षणिक संस्थांनाही अनेक अडचणींचा सामना करावा लागू शकतो. त्यामुळे कोपरगाव ते सावळीविहीर फाटा या मार्गाप्रमाणेच कोपरगाव ते तालुका हद्दीपर्यंतचा महामार्ग पूर्वीच्या मंजुरीनुसार सिमेंट काँक्रिटचा चौपदरी करण्यात यावा. या मार्गावर उड्डाणपूल उभारण्यात येऊ नयेत, अशी स्पष्ट भूमिका आमदार काळे यांनी दिलेल्या निवेदनात मांडली आहे. तसेच, या महामार्गालगतच्या व्यावसायिकांसाठी १५० मीटर आणि बिगरशेती प्लॉटवरील रहिवाशांसाठी २५० मीटरपर्यंत आखण्यात आलेली आरक्षित सीमारेषा रद्द करून हे क्षेत्र २०५० नंतरच्या नियोजनासाठी आरक्षित करण्यात यावे, अशी मागणीही त्यांनी केली आहे.
दरम्यान, सहापदरीकरणाची आवश्यकता विचारात घ्यायची झाल्यास ती कोपरगाव-अहिल्यानगर महामार्गासाठी अधिक प्राधान्याने विचारात घेण्याची गरज असल्याचे आमदार आशुतोष काळे यांनी नमूद केले आहे. या मार्गावर जगप्रसिद्ध श्री साईबाबा देवस्थान, शनी शिंगणापूर देवस्थान, साखर कारखाने, दूध संघ तसेच आंतरराष्ट्रीय विमानतळ असल्यामुळे देश-विदेशातून येणाऱ्या भाविकांची आणि वाहनांची मोठी वर्दळ असते. त्यामुळे भविष्यातील वाहतूक कोंडी टाळण्यासाठी कोपरगाव-अहिल्यानगर महामार्गाच्या सहापदरीकरणाचा विचार करण्यात यावा, अशी मागणी आमदार आशुतोष काळे यांनी केंद्रीय मंत्री नितीन गडकरी यांच्याकडे केली आहे.

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments

error: Content is protected !!