गंगेश्वर महादेव मंदिर जिर्णोध्दार
जेऊर कुंभारी वार्ताहर
“देवाधिदेव महादेवाची निरंतर सेवा करायला मिळणे हे मोठ्या भाग्याचे लक्षण आहे. श्रीमंत पवार सरकार यांचे मोठे योगदान राहिले आहे. त्यांनी उभारलेल्या गंगेश्वर महादेवाची दैनंदिन सेवा आणि पावित्र्य गांवक-यांनी एकत्र येवून सुरु ठेवावे.” असे आवाहन करुन शिव भक्तीचा महिमा मोठा असल्याचे राष्ट्रसंत जनार्दन स्वामी आश्रमाचे मठाधिपती संत रमेशगिरीजी महाराज यांनी सांगितले.
श्रीमंत महामहीम सरकार संस्थान यांनी उभारलेल्या कोपरगाव तालुक्यातील जेऊर कुंभार येथे गोदावरी नदीतीरालगतचे गंगेश्वर महादेवाच्या तिसऱ्या जिर्णोद्धाराचा टप्पा पहिल्या श्रावणी सोमवारच्या दिवशी राष्ट्रसंत जनार्दन स्वामी आश्रमाचे मठाधिपती संत रमेशगिरीजी महाराज यांचे शुभ हस्ते संपन्न झाला.
कार्यक्रमास राष्ट्रसंत जनार्दन स्वामी आश्रमाचे मठाधिपती संत रमेशगिरीजी महाराज, श्रीमंत पवार सरकार संस्थांच्या महादेव देवस्थानचे मुख्य कार्यकारी अधिकारी सुशांत घोडके, पंचक्रोशीतील नागरिकांसह जेऊर कुंभारीचे ग्रामस्थ मोठ्या संख्येने उपस्थित होते.
याप्रसंगी श्रीमंत पवार संस्कार संस्थांच्या महादेव देवस्थान यांचे मुख्य कार्यकारी अधिकारी सुशांत घोडके म्हणाले, श्रीमंत पवार सरकार संस्थांनचे कार्य, मान आणि शान म्हणून भूषणावह आहे. त्यांनी शिव भक्तांसाठी ठिकठिकाणी महादेवाची मंदिरे उभारली आहे. गंगेश्वर महादेवाच्या जिर्णोद्धार करता जेऊर कुंभारी सह परिसरातील भाविकांनी यथोचित योगदान दिले आहे. संस्थांनमार्फत केलेल्या सण उत्सवात आपण नेहमीच सहभागी होत रहावे.”
या कार्यक्रमाच्या निमित्ताने शिवलिंग प्राण पुनर्स्थापित विधी कलश पूजन आणि कलशारोहण ध्वज पूजन आणि ध्वजारोहण विधी संपन्न झाला कार्यक्रमास नऊ दांपत्यांनी होम हवन धार्मिक विधी संपन्न केला. पौरोहित्य लावर गुरुजी यांच्यासह इतरही पुरोहित उपस्थित होते. याप्रसंगी भाविकांना फराळाचे वाटप करण्यात आले.
