कोपरगाव प्रतिनिधी
शारीरिक अपंगत्वावर मात करून स्वाभिमानाने आणि स्वावलंबीपणे जीवन जगता यावे या उदात्त हेतूने श्री भगवान महावीर विकलांग सहायता समिती मुंबई, एनएसई (NSE) फाउंडेशन व आमदार आशुतोष काळे यांच्या सहकार्यातून कोपरगाव मतदार संघातील दिव्यांग बंधू भगिनींसाठी गुरुवार (दि.२५) रोजी सकाळी ९ वा. दिव्यांग बंधू भगिनींची तपासणी करण्यात येवून शुक्रवार (दि.२६) रोजी मोफत कृत्रिम अवयव आणि आवश्यक साहित्य वाटप कोपरगाव येथील महात्मा गांधी जिल्हा प्रदर्शन चॅरिटेबल ट्रस्टच्या सभागृहात होणार आहे. अशी माहिती आमदार आशुतोष काळे यांच्या जनसंपर्क कार्यालयाकडून देण्यात आली आहे.
आर्थिक अडचणीमुळे दिव्यांगांना महागडे कृत्रिम अवयव व्हीलचेअर किंवा इतर आधुनिक साधने खरेदी करणे शक्य होत नसल्यामुळे त्यांचे जीवन परावलंबी होवून त्यांना दैनंदिन जीवन जगतांना दुसऱ्यांवर अवलंबून राहावे लागते. दिव्यांग बांधवांची ही अडचण आणि वेदना ओळखून आमदार आशुतोष काळे यांनी सामाजिक बांधिलकीच्या भावनेतून पुढाकार घेत दिव्यांग बांधवांसाठी दोन दिवसीय शिबिराचे आयोजन केले आहे. या शिबिरामध्ये अत्याधुनिक कृत्रिम अवयव, पोलिओग्रस्त रुग्णांसाठी कॅलिपर्स, फिरण्यासाठी व्हीलचेअर, थ्री-व्हीलर सायकल, कुबड्या, वॉकर तसेच श्रवणदोष असलेल्या व्यक्तींसाठी आधुनिक श्रवणयंत्रे अशा विविध प्रकारच्या साहित्याचे मोफत वाटप करण्यात येणार आहे. त्यामुळे मतदारसंघातील शेकडो गरजवंत दिव्यांगांना मदत होऊन त्यांच्या जीवनाला नवी दिशा मिळणार आहे.
या शिबिरात येणाऱ्या दिव्यांग बांधवांची गुरुवार (दि.२५) रोजी तज्ज्ञ डॉक्टरांच्याद्वारे मोफत तपासणी करून शुक्रवार (दि.२६) रोजी त्यांना आवश्यक साहित्यांचे वाटप करण्यात येणार आहे. या संधीचा लाभ घेण्यासाठी दिव्यांग बांधवांनी येतांना आपले आधार कार्ड व शासकीय दिव्यांग प्रमाणपत्र, युडीआयडी कार्ड व दोन पासपोर्ट साईज फोटो सोबत आणणे आवश्यक आहे. कोपरगाव मतदारसंघातील दिव्यांग बांधवांनी वेळेवर उपस्थित राहून जास्तीत जास्त दिव्यांग बांधवांनी या संधीचा लाभ घ्यावा असे आवाहन आमदार आशुतोष काळे यांनी केले आहे.
