कोपरगाव प्रतिनिधी
कोपरगाव तालुका व्यापारी महासंघाचे कार्याध्यक्ष तथा बालाजी सुपर मार्केटचे संस्थापक सुधीर डागा यांची महाराष्ट्रातील व्यापारी, उद्योजक आणि उद्योग क्षेत्रातील सर्वोच्च संघटना असलेल्या महाराष्ट्र चेंबर ऑफ कॉमर्स, इंडस्ट्री अँड अॅग्रिकल्चर (MACCIA) च्या गव्हर्निंग कौन्सिल सदस्यपदी निवड झाल्याने कोपरगाव तालुक्यासह संपूर्ण अहिल्यानगर जिल्ह्यातील व्यापारी वर्गामध्ये आनंदाचे वातावरण निर्माण झाले आहे. अशी माहिती कोपरगाव तालुका व्यापारी महासंघाचे सचिव प्रदीप साखरे यांनी दिली.दरम्यान, महाराष्ट्र चेंबर ऑफ कॉमर्सच्या अध्यक्षपदी सांगलीचे प्रसिद्ध उद्योजक रवींद्र मानगावे, तर उपाध्यक्षपदी महेंद्र अग्रवाल (धुळे) आणि वरिष्ठ उपाध्यक्षपदी कमलाकर शेट्टी यांची निवड झाली आहे. नव्या कार्यकारिणीच्या माध्यमातून राज्यातील व्यापार व उद्योग क्षेत्राला चालना देण्यासाठी विविध उपक्रम राबविण्यात येणार आहेत.याबाबत अधिक माहिती देताना व्यापारी महासंघाचे उपाध्यक्ष अजित लोहाडे म्हणाले की, सुमारे चाळीस वर्षांपूर्वी व्यापारी महासंघाचे अध्यक्ष ओमप्रकाश दादाप्पा तथा काका कोयटे यांची देखील महाराष्ट्र चेंबर ऑफ कॉमर्समध्ये गव्हर्निंग कौन्सिल सदस्य पदी निवड झाली होती. त्यांनी या पदावर कार्यरत राहून कोपरगावच्या व्यापारी वर्गाचे प्रतिनिधित्व केले होते. त्यानंतर तब्बल चार दशकांनंतर कोपरगावसारख्या ग्रामीण भागातील व्यापाऱ्याला या प्रतिष्ठित संस्थेमध्ये प्रतिनिधित्व करण्याची संधी मिळाली आहे. त्यामुळे स्थानिक व्यापार क्षेत्राला राज्यस्तरावर प्रभावी व्यासपीठ मिळणार असून व्यापाऱ्यांच्या विविध प्रश्नांना न्याय मिळण्यास मदत होणार आहे.सुधीर डागा यांनी गेल्या अनेक वर्षांपासून किरकोळ व्यापार, ग्राहक हित आणि व्यापाऱ्यांच्या प्रश्नांसाठी सातत्याने काम केले आहे. त्यांनी मांडलेली ‘वन रेट, वन वेट, वन नेशन’ ही संकल्पना राज्यभर चर्चेचा विषय ठरली आहे. त्यांच्या कार्याची दखल घेत महाराष्ट्र चेंबर ऑफ कॉमर्सने त्यांना सदस्यपदाची संधी दिली असून ही त्यांच्या कार्याची पावती असल्याचे तालुका व्यापारी महासंघाचे खजिनदार तुलसीदास खुबानी यांनी सांगितले.
कोपरगाव तालुका किराणा मर्चंट असोसिएशनचे अध्यक्ष राजकुमारजी बंब यांनी सांगितले की, महाराष्ट्र चेंबर ऑफ कॉमर्स ही व्यापारी, उद्योजक, उद्योगपती आणि शेतकरी यांना एकत्र आणणारी राज्यातील शिखर संघटना आहे. या संस्थेच्या मागण्यांना राज्य शासन तसेच केंद्र शासन स्तरावरही विशेष महत्त्व दिले जाते. त्यामुळे किरकोळ किराणा व्यापारी, लघु उद्योजक, घाऊक व्यापारी तसेच ग्रामीण भागातील व्यावसायिकांच्या अडचणी या माध्यमातून प्रभावीपणे मांडल्या जाऊन त्यांचे निराकरण होण्यास मदत होईल.सुधीर डागा यांच्या निवडीमुळे कोपरगाव तालुक्यातील व्यापार, उद्योग आणि उद्योजकता विकासाला नवीन दिशा मिळेल, असा विश्वास व्यापारी संघटनांच्या पदाधिकाऱ्यांनी व्यक्त केला. विशेषतः जीएसटीमधील अडचणी, ऑनलाईन व्यापारामुळे निर्माण झालेली स्पर्धा, लघु व्यापाऱ्यांचे संरक्षण, व्यवसाय सुलभता, बाजारपेठांचा विस्तार, डिजिटल व्यवहारांना प्रोत्साहन आणि ग्रामीण भागातील उद्योजकांसाठी आवश्यक सुविधा यासंदर्भातील प्रश्न राज्यस्तरावर मांडण्यासाठी ही निवड महत्त्वाची ठरणार असल्याचे मत व्यक्त करण्यात आले.याच अनुषंगाने महाराष्ट्र चेंबर ऑफ कॉमर्सच्या ‘गाव तेथे उद्योजक’ या महत्त्वाकांक्षी उपक्रमांतर्गत कोपरगावमध्ये यापूर्वी यशस्वीरीत्या आयोजित करण्यात आलेल्या ‘मेक इन कोपरगाव’ या उपक्रमाचे पुढील टप्प्यात अधिक व्यापक स्वरूपात आयोजन करण्यात येणार असल्याची माहिती हर्षल कृष्णानी आणि मानव शुक्ला यांनी दिली. या कार्यक्रमाच्या माध्यमातून स्थानिक उद्योजक, स्टार्टअप्स, महिला उद्योजक, युवा व्यावसायिक आणि शेतकरी उत्पादक गटांना एकत्र आणून रोजगारनिर्मिती व उद्योगवृद्धीस चालना देण्याचा मानस व्यक्त करण्यात आला.सुधीर डागा यांच्या निवडीबद्दल कोपरगाव तालुका व्यापारी महासंघ, किराणा मर्चंट असोसिएशन तसेच विविध व्यापारी संघटनांच्या पदाधिकाऱ्यांनी त्यांचे अभिनंदन केले असून त्यांच्या माध्यमातून कोपरगावच्या व्यापारी वर्गाचा आवाज राज्यस्तरावर अधिक प्रभावीपणे पोहोचेल, असा विश्वास व्यक्त केला आहे.सुधीर डागा यांच्या निवडीमुळे कोपरगावसारख्या ग्रामीण भागातील कार्यकर्त्याला राज्य पातळीवर काम करण्याची संधी मिळाली आहे. त्यांनी अहिल्यानगर जिल्ह्यातील व्यापाऱ्यांची एकजूट करून जिल्ह्याचे नाव राज्यभर उंचावावे. तसेच महाराष्ट्र चेंबर ऑफ कॉमर्सचे नवनियुक्त अध्यक्ष रवींद्र मानगावे यांचा तालुका व्यापारी महासंघ व किराणा मर्चंट असोसिएशनच्या वतीने सत्कार आयोजित करण्यात येणार आहे. ‘गाव तेथे उद्योजक’ या उपक्रमांतर्गत तालुक्यात मोठ्या प्रमाणात उद्योजक घडविण्याचा संकल्प आहे.”– ओमप्रकाश दादाप्पा तथा काका कोयटे
अध्यक्ष, कोपरगाव तालुका व्यापारी महासंघ
