कोपरगाव प्रतिनिधी
मागील सहा वर्षात कोपरगाव विधानसभा मतदार संघातील दिव्यांग बांधवांसाठी देवदूत ठरलेले व जवळपास दीड हजाराच्यावर दिव्यागांना विनासायास दिव्यांग प्रमाणपत्र मिळवून देणाऱ्या आमदार आशुतोष काळे यांच्या पाठपुराव्याची आरोग्य विभागाने अखेर दखल घेतली असून यापुढे कोपरगाव मतदार संघातील दिव्यांग बांधवांना दर महिन्याच्या दुसऱ्या व चौथ्या बुधवारी श्रीरामपूरलाच वैश्विक दिव्यांग प्रमाणपत्र मिळणार आहे. त्यामुळे कोपरगावसह इतरही चार तालुक्याच्या दिव्यांग बांधवांना मोठा दिलासा मिळाला आहे.
कोपरगाव मतदार संघातील दिव्यांगांना व त्यांच्या नातेवाईकांना वैश्विक दिव्यांग प्रमाणपत्र मिळविण्यासाठी होणारा त्रास वाचविण्यासाठी प्रत्येक दिव्यांग व्यक्तीला सन्मानाने हक्काचे वैश्विक दिव्यांग प्रमाणपत्र मिळवून द्यायचेच हा निश्चय करून आमदार आशुतोष काळे यांनी २०१९ पासून निवडून येताच दर महिन्याच्या पहिल्या बुधवारी कोपरगाव येथून जिल्हा रुग्णालयात जाण्यासाठी मोफत बससेवा आणि त्यांना मदत करण्यासाठी आपल्या संपर्क कार्यालयाची यंत्रणा उभी केलेली आहे. हा सामाजिक उपक्रम आजतागायत सुरु असून त्याबाबत नियमितपणे सोशल मिडीयाच्या माध्यमातून जनजागृती करून मतदार संघातील एकही दिव्यांग शासनाच्या अधिकृत दिव्यांग प्रमाणपत्रापासून वंचित राहणार नाही हा त्यांचा प्रयत्न आहे.
त्याचबरोबर कोपरगाव पासून जवळपास १०० किलोमीटर पेक्षा जास्त दूरवर असणाऱ्या अहिल्यानगर येथील जिल्हा रुग्णालयात दिव्यांग तपासणीसाठी दिव्यांग व त्यांच्या पालकांना होणारा त्रास कमी व्हावा यासाठी शिर्डी, राहाता, श्रीरामपूर याठिकाणी कोपरगाव तालुक्यासह जिल्ह्याच्या उत्तरेच्या तालुक्यातील दिव्यांग रुग्णांची तपासणी होवून त्यांना तिथेच वैश्विक दिव्यांग प्रमाणपत्र मिळावे याबाबत आमदार आशुतोष काळे यांचा आरोग्यविभागाकडे सातत्याने पाठपुरावा सुरु होता व हि अडचण त्यांनी पालकमंत्र्यांकडे देखील मांडली होती. अखेर पाठपुरावा फळाला आला असून पुढील महिन्यापासून दिव्यांग बांधवांना तपासणीसाठी व वैश्विक दिव्यांग प्रमाणपत्र मिळविण्यासाठी अहिल्यानगरच्या जिल्हा रुग्णालयात जाण्याची गरज नाही. यापुढे श्रीरामपूर येथील उपजिल्हा रुग्णालयस्तरावरील ग्रामीण रुग्णालयात दिव्यांगांची तपासणी करून त्यांना वैश्विक दिव्यांग प्रमाणपत्र वितरीत करण्यात येणार आहे.त्यामुळे अकोले ते अहिल्यानगर १२७, त्यानंतर संगमनेर ते अहिल्यानगर १०७, कोपरगाव ते अहिल्यानगर १००, राहाता ते अहिल्यानगर ८० व श्रीरामपूर ते अहिल्यानगर ६७ किलोमीटरचे अंतर आहे. श्रीरामपूर तालुका वगळता इतर कोपरगाव, राहाता, संगमनेर, अकोले या तालुक्यातून अहिल्यानगर जाण्याचा प्रवासाचा त्रास जवळपास निम्याने कमी होवून वेळ देखील वाचणार आहे. त्यामुळे दिव्यांग बांधवांनी विशेषत: त्यांच्या पालकांनी आमदार आशुतोष काळे यांचे आभार मानले आहे.कोपरगाव तालुक्यासह श्रीरामपूर,राहाता,संगमनेर व अकोले तालुक्यातील दिव्यांग बांधवांची दूरवर जाण्याची अडचण कमी केल्यामुळे आमदार आशुतोष काळे यांनी राज्याचे मुख्यमंत्री ना.देवेंद्रजी फडणवीस, उपमुख्यमंत्री ना.श्रीम.सुनेत्राताई पवार, उपमुख्यमंत्री ना.एकनाथजी शिंदे, आरोग्यमंत्री ना.प्रकाशजी आबिटकर, पालकमंत्री ना. राधाकृष्ण विखे पा. यांचे दिव्यांग बांधव व त्यांच्या पालकांच्या वतीने आभार मानले आहे.
मतदार संघातील सर्वच दिव्यांग बांधवांना शासनाच्या योजनांचा लाभ मिळावा यासाठी एकही दिव्यांग व्यक्ती दिव्यांग पत्रापासून वंचित राहणार नाही हा माझा प्रयत्न असून त्याचबरोबर दिव्यांग व्यक्ती व त्यांचे पालक यांना वैश्विक दिव्यांग प्रमाणपत्र मिळविण्यासाठी कमीत कमी वेळात कसे मिळवून देता येईल या उद्देशातून दिव्यागांचा प्रवासाचा निम्मा त्रास कमी करण्यात यश मिळाले आहे. कोपरगाव उपजिल्हा रुग्णालयाचे काम प्रगतीपथावर असून दिव्यागांना येत्या काही महिन्यात कोपरगावच्या उपजिल्हा रुग्णालयातच वैश्विक दिव्यांग प्रमाणपत्र मिळवून देणार आहे.-आमदार आशुतोष काळे.
