जेऊर कुंभारी वार्ताहर
कोपरगांव तालुक्यातील जेऊर कुंभारी येथील आपल्या सामाजिक उपक्रमातून नावलौकिक मिळविलेल्या शिवसूत्र युवा प्रतिष्ठान या संघटनेचा नऊवा वर्धापन दिन नुकताच साजरा करण्यात आला. सदर प्रसंगी सकाळी नऊ वाजता छत्रपती शिवाजी महाराज यांच्या प्रतिमेचे तसेच प्रतिष्ठानच्या फलकाचे पूजन करून पुष्पहार अर्पण करण्यात आला. यावेळी प्रतिष्ठानचा नऊ वर्षांचा प्रवासाचा लेखाजोखा मांडताना प्रतिष्ठानचे संस्थापक सुधाकर वक्ते यांनी सांगितले की प्रतिष्ठानने एकच ध्यास सर्वांगीण विकास हे ब्रीद स्वीकारून छत्रपती शिवाजी महाराजांच्या स्वराज्याला आदर्श मानून समाजसेवेचे ध्येय उराशी बाळगून आजवर वृक्षारोपण करणे,शालेय विद्यार्थी दत्तक घेणे, त्यांना शालेय साहित्य पुरविणे, खेळाडूंना प्रोत्साहन म्हणून क्रीडा स्पर्धांचे आयोजनकरणे,सार्वजनिक गणेशोत्सव मिरवणुकीतून स्री जन्माचे स्वागत करण्याविषयी जनजागृती करणे, उन्हाळ्यात सार्वजनिक पानपोही उभारने ,गरजू व निराधार लोकांना स्वेटर व ब्लॅंकेटचे वाटप करणे, रक्तदान शिबिरे राबविणे,महापुरुषांचे विचार मनात रुजावेत यासाठी महापुरुषांची सार्वजनिक जयंती उत्सव साजरा करणे,गरजू रुग्णांना हवा तो ब्लड ग्रुपचे रक्त उपलब्ध करून देणे यासारखे अनेक सामजिक उपक्रम राबवून नावलौकिक मिळविला आहे. प्रतिष्ठानच्या या उपक्रमाचे आजवर अनेक मान्यवरांनी कौतुक केले असल्याचे त्यांनी सांगितले. प्रतिष्ठानचे अध्यक्ष विशाल गुरसळ म्हणाले की, प्रतिष्ठानच्या सामाजिक कार्यातून प्रतिष्ठानचे कौतुक तर झालेच शिवाय प्रतिष्ठान मुळे प्रतिष्ठानच्या सदस्यांना समाजात मानाचे स्थान मिळून एक नवीन ओळख मिळाली. यातून अभिमानाची भावना मनामध्ये तयार होते. तर प्रतिष्ठानचे माजी अध्यक्ष व ग्रामपंचायत सदस्य प्रदीप गायकवाड यांनी संघटनेचे यश हे सभासदांच्या संख्येवर अवलंबून नसून सभासदांच्या प्रामाणिकतेवर आणि संघटने प्रति असलेल्या समर्पणाच्या भावनेवर अवलंबून असल्याचे अधोरेखित करताना प्रतिष्ठानच्या सदस्यांच्या एकजुटीच्या बळावर ही यशस्वी वाटचाल झाली असल्याचे सांगितले. तर ज्येष्ठ सदस्य राहुल वक्ते यांनी सर्व सदस्यांचे आभार मानत सर्वांना वर्धापन दिनाच्या शुभेच्छा दिल्या. त्यानंतर सकाळी दहा वाजता जिल्हा परिषद प्राथमिक शाळा गिरमे वस्ती येथे वर्धापन दिनानिमित्त प्रतिष्ठानच्या वतीने सर्व विद्यार्थ्यांना वही पेन पेन्सिल आदी शालेय साहित्याचे वाटप करण्यात आले. शाळेच्या मुख्याध्यापिका जोशी मॅडम, शिक्षक साळुंखे सर, दुमने सर यांनी प्रतिष्ठानच्या या उपक्रमाचे स्वागत करून वर्धापन दिनाच्या शुभेच्छा दिल्या यावेळी जेष्ठ ग्रामस्थ किसनराव सोळंके, गोरखराव चव्हाण, तुषार आप्पा गुरसळ, शिक्षक वृंद,प्रतिष्ठानचे सर्व सदस्य शालेय विद्यार्थी मोठ्या संख्येने उपस्थित होते. दरम्यान अनेक मान्यवरांनी ग्रामस्थांनी व प्रतिष्ठानच्या हितचिंतकांनी सोशल मिडियाच्या माध्यमातून तसेच फोन द्वारे प्रतिष्ठानच्या वर्धापन दिनानिमित्त शुभेच्छांचा वर्षाव केला.
