कोपरगाव प्रतिनिधी
तपोनिधी श्री आनंद आखाडा पंचायती वाराणशी उत्तरप्रदेश, सिंहस्थ कुंभमेळयाचे प्रमुख मार्गदर्शक व गुरूकुल सेवा आश्रम त्रंबकेश्वरचे संस्थापक ब्रम्हलिन स्वामी सागरानंद सरस्वती महाराज यांच्या कार्य व्यासंगावर नेवासाफाटा येथील सेवानिवृत्त शिक्षक रंगनाथ किसन डहाळे सर व रामदासीबाबा भक्त मंडळ कोकमठाण यांनी संपादित केलेल्या भक्तीचा सागरानंद या पुस्तकाचे प्रकाशन सोमवार १६ जानेवारी रोजी सकाळी ११ वाजता गोदावरी धामचे महंत रामगिरी महाराज, खातगाव कर्जत येथील समर्थ मठाचे कार्याध्यक्ष समर्थभक्त मोहनबुवा रामदासी, श्री श्री १००८ गणेशानंद सरस्वती महाराज यांच्या हस्ते होत आहे. कोरोना महामारीच्या काळात प्राचार्य अशोकराव शिंदे यांनी या पुस्तकाची मुळ संकल्पना मांडली त्यावर नेवासाफाटा येथील सेवानिवृत्त शिक्षक, संपादक रंगनाथ किसन डहाळे सर यांनी स्वामी सागरानंद सरस्वती महाराज आणि त्यांचे सर्व शिष्य, अनुयायी आदिशी संपर्क करून भक्तीचा सागरानंद हे सचित्र पुस्तक तयार केले. मात्र प्राचार्य अशोकराव शिंदे यांचे कोरोनामुळे निधन झाले आणि त्यानंतर स्वामी सागरानंद सरस्वती महाराज आजारी पडून ८ ऑक्टोबर २०२२ रोजी त्यांचे महानिर्वाण झाले.ब्रम्हलिन संत रामदासीबाबा आणि ब्रम्हलिन स्वामी सागरानंद सरस्वती महाराज हे दोघेही सहयोगी होते. रामदासीबाबा ज्या ज्या वेळी चार्तुमासाला जायचे त्या त्या वेळी सागरानंद सरस्वती महाराज व अन्य संत महंत मंडळी एकत्र असायची. स्वामी सागरानंद सरस्वती महाराज यांना ब्रम्हलिन संत रामदासीबाबा यांनी त्यांच्या शोडसी विधीची सर्व माहिती अगोदरच देवुन ठेवली होती.सेवानिवृत्त शिक्षक रंगनाथ डहाळे सर यांनी रामदासीबाबा यांच्या जीवन कार्याचा अभ्यास करून कृष्णा गोदाकाठचे योगी रामदासबाबा, तीनखणीचा रामानुभव, रामदासीबाबा आणि समर्थविचारधारा व संत नरहरी महाराज या चार पुस्तकांचे लेखन प्रकाशन केले आहे. याशिवाय कोरोना लॉकडाउन काळात डहाळे सर यांनी ज्ञानेश्वरी, तुकाराम गाथा आणि दासबोधाचेही हस्तलेखन केले होते. भक्तीचा सागरानंद हे त्यांचे पाचवे पुस्तक आहे. या पुस्तकाला स्वामी सागरानंद सरस्वती यांचे परमशिष्य सोलापुर येथील मोरयानंद सरस्वती यांनी मनोगत लिहीले आहे., या पुस्तकाचे संपादन आराखडा सहाय्य, मांडणी पत्रकार महेश मधुकर जोशी यांनी केले आहे.
