कोपरगाव प्रतिनिधी
तालुक्यातील ब्राम्हणगाव येथील प्रगतशिल शेतकरी, उद्योजक, साईभक्त व साईचरित्रकार दासगणु यांचा सहवास लाभलेले साईबाबा संस्थान (शिर्डी) चे माजी विश्वस्थ व साईगंगा मिनरल वॉटर, हाॅटेल स्पॅन, साई बाईक्सचे सर्वेसर्वा, सहकारमहर्षी शंकरराव कोल्हे सहकारी सारवर कारखान्याचे माजी उपाध्यक्ष प्रभाकर तुकाराम ऊर्फ पी.टी. बोरावके (९२) यांचे निधन झाले. त्याच्या मागे अनिल व नितीन दोन मुले व सुना नातवंडे असा परिवार आहे. त्यांच्या पार्थीवावर कोपरगांव अमरधाम येथे अंत्यसंस्कार करण्यांत आले. आंतरराष्ट्रीय किर्तीच्या शिर्डी साईबाबांच्या समाधीवर ते गेल्या ४० ते ४५ वर्षापासून दररोज नित्यनियमाने फुले वाहत. साई पुजेचाही त्यांच्या घराण्याला मान होता. त्यांचे वडील कै. तुकाराम बोरावके हे देखील निस्सीम साईभक्त होते, त्यांना देखील साईबाबांचा सहवास लाभला होता. ब्राम्हणगांव शेतातून ते दररोज साईपुजेला फुले नेत. त्यानंतर त्यांचे चिरंजीव कै. पी. टी. बोरावके यांनी हा वसा जपला. ‘सहकारमहर्षी शंकरराव कोल्हे सहकारी साखर कारखान्यांच्या १९७८ ते १९८४ संचालक मंडळात त्यांचा सहभाग होता. १० ऑगस्ट १९८२ ते १० ऑक्टोबर १९८३ या काळात ते कारखान्याचे उपाध्यक्ष होते. माजीमंत्री स्व. शंकरराव कोल्हे यांच्याबरोबर विश्वासू सहकारी म्हणून त्यांनी काम केले होते. मोसंबी -संत्रा फळफळावळचे राज्यस्तरावर प्रगतशिल शेतकरी म्हणून त्यांची ख्याती होती. महाराष्ट्र राष्ट्रभाषा पुणे याबरोबरच राज्यस्तरावरील विविध संस्थेमध्ये त्यांनी काम केले होते. कोपरगाव येथील स्वातंत्र्यसैनिक गंगाधर गवारे मामा फाउंडेशनचे ते अध्यक्ष होते. त्यांच्या निधनाने अखिल भारतीय माळी समाज व राज्यात हळहळ व्यक्त होत आहे. कै पी. टी. बोरावके यांच्या निधनाबद्दल मुख्यमंत्री एकनाथ शिंदे, उपमुख्यमंत्री देवेंद्र फडणवीस, महसुलमंत्री राधाकृष्ण विखे, माजी मंत्री छगनराव भुजबळ, खासदार डॉ. सुजय विखे, खासदार सदाशिव लोखंडे, आमदार आशुतोष काळे, संजीवनी उद्योग समुहाचे अध्यक्ष बिपीनदादा कोल्हे, संजीवनी एज्युकेशन सोसायटीचे कार्याध्यक्ष नितीनदादा कोल्हे, माजी आमदार अशोक काळे, भाजपाच्या प्रदेश सचिव स्नेहलता कोल्हे,जिल्हा बँकेचे संचालक युवानेते विवेक कोल्हे, संजीवनी ग्रुप ऑफ इन्स्टिट्यूटचे कार्यकारी विश्वस्त अमित कोल्हे, जिल्हा पत्रकार संघाचे सुरेश रासकर, कोपरगांव तासका पत्रकार संघाचे अध्यक्ष स.म. कुलकर्णी, जिल्हा परिषदेचे सदस्य राजेश परजणे यांच्यासह अनेकांनी शोक व्यक्त केला.
