कोपरगाव प्रतिनिधी
पुढील पिढीला सक्षम करण्यासाठी प्रत्येक महिला झगडत असते. मुलांचे भविष्य घडविण्यासाठी तिची सर्व धडपड असते. जीवघेण्या कोरोना संकटाने संपूर्ण विश्वाला खूप काही शिकविले आहे. त्याप्रमाणे महिलांनी देखील या महामारीत घरबसल्या कुटुंबाचा चरितार्थ चालविण्यासाठी घरबसल्या अर्थार्जन करण्याची कला आत्मसात केली असून महिलांनी अनेक गृह उद्योग सुरु केले आहेत. अनेक महिला आजही घरबसल्या गृह उद्योग करीत आहेत. मात्र आर्थिक अडचणी निर्माण झाल्यामुळे काही महिलांचे गृह उद्योग बंद पडू शकतात त्या महिलांना किंवा ज्या महिलांना आपल्या उद्योग व्यवसायाची व्याप्ती वाढविण्यासाठी आर्थिक मदतीची गरज आहे. अशा महिलांना आर्थिक आधार देण्यासाठी यापुढील काळात जास्तीत जास्त कर्ज उपलब्ध करून देणार असल्याचे जिल्हा सहकारी बँकेच्या माजी संचालिका सौ. चैतालीताई काळे यांनी सांगितले.
जागतिक महिला दिनाचे औचित्य साधत कोपरगाव येथे आज प्रियदर्शनी इंदिरा महिला मंडळ संचलित १९ बचत गटांना अहमदनगर जिल्हा सहकारी बँकेच्या माजी संचालिका सौ. चैतालीताई काळे यांच्या हस्ते ३१ लक्ष ४ हजार रुपयांचे कर्जवाटप करण्यात आले. याप्रसंगी त्या बोलत होत्या. त्या पुढे म्हणाल्या की, प्रियदर्शनी इंदिरा महिला मंडळाच्या माध्यातून बचत गटाच्या महिलांना आर्थिक दृष्ट्या भक्कम करण्यासाठी सर्वोतोपरी प्रयत्न केले जात आहे.बचत गटांना आर्थिक सहाय्य करण्यासाठी सहकार्य करून जास्तीत जास्त महिला आर्थिक दृष्ट्या सक्षम होण्यासाठी करण्यात आलेल्या कर्ज वितरणातून महिला बचत गटांनी घेतलेल्या कर्जाचा योग्य विनियोग करून आपल्या गृह उद्योगाची व्याप्ती वाढवून आर्थिक दृष्ट्या सक्षम व्हावे असे आवाहन केले.
यामध्ये कार्तिक स्वामी बचत गट (जेऊर पाटोदा), लक्ष्मी कुबेर बचत गट (जेऊर पाटोदा), सप्तशृंगी बचत गट ( माहेगाव देशमुख), कृष्णा बचत गट (कोळपेवाडी), रोझ बचत गट (गवारेनगर, कोपरगाव), गृहिणी बचत गट (कोळपेवाडी), सावित्रीबाई फुले बचत गट (चांदेकसारे), भिमाई बचत गट (सोनेवाडी), जिजाऊ बचत गट (माहेगाव देशमुख), संत रोहिदास बचत गट (कोळपेवाडी), भीमाशंकर बचत गट (कोळपेवाडी), प्रगती बचत गट (कोळपेवाडी),रमाई बचत गट (जेऊर पाटोदा), आराध्या बचत गट (सोनेवाडी), दामिनी बचत गट (सोनेवाडी), खंडोबा बचत गट (माहेगाव देशमुख), आशिर्वाद बचत गट (माहेगाव देशमुख), राधा बचत गट (माहेगाव देशमुख),मुस्कान बचत गट (माहेगाव देशमुख) आदी गटांचा समावेश आहे.
यावेळी नगरसेविका श्रीमती वर्षा गंगूले,सौ. माधवी वाकचौरे, सौ.स्वप्नजा वाबळे आदींसह बचत गटांच्या अध्यक्षा, उपाध्यक्षा,सचिव व सदस्या मोठ्या संख्येने उपस्थित होत्या.
बचत गटाच्या महिलांना कर्ज वितरणाचे धनादेश प्रदान करतांना सौ. चैतालीताई काळे, समवेत मान्यवर व महिला बचत गटाच्या सदस्या.
