जेऊर कुंभारी वार्ताहर
शाळेने आपल्याला घडविले, त्यामुळे शाळेच्या ऋणातून उतराई होण्यासाठी माजी विद्यार्थ्यांनी विद्यालयाच्या भौतिक सुविधा सक्षम करण्यासाठी घेतलेला पुढाकार कौतुकास्पद आहे. माजी विद्यार्थ्यांचे विद्यालयाच्या प्रगतीकडे असलेले विशेष लक्ष ही अभिमानाची बाब असल्याचे प्रतिपादन ज्येष्ठ स्कूल कमिटी सदस्य रामराव साळुंखे यांनी केले.
कुंभारी येथील गुरुवर्य तुकारामबाबा विद्यालयात २००६-०७ च्या माजी विद्यार्थी बॅचच्या वतीने आयोजित स्नेहमिलन सोहळ्यात अध्यक्षस्थानावरून ते बोलत होते. यावेळी माजी विद्यार्थ्यांनी विद्यालयाला २१ हजार रुपये किमतीचे दोन सेफ्टी डोअर भेट देऊन सामाजिक बांधिलकी जपली.
साळुंखे म्हणाले की, शिक्षण हे वाघिणीचे दूध आहे. शिक्षणाच्या माध्यमातूनच विद्यार्थ्यांच्या जीवनाला योग्य दिशा मिळते. या विद्यालयाने १९७१ पासून अनेक गुणवंत विद्यार्थी घडविले असून, आज हे विद्यार्थी देशासह परदेशातही विविध उच्च पदांवर कार्यरत आहेत. बदलत्या डिजिटल युगात आधुनिक तंत्रज्ञानाचा स्वीकार करून विद्यार्थ्यांना गुणवत्तापूर्ण शिक्षण देण्याबरोबरच त्यांच्या शारीरिक आरोग्याकडेही लक्ष देणे आवश्यक आहे. विद्यालयाची होत असलेली उत्तरोत्तर प्रगती समाधानकारक असल्याचे त्यांनी सांगितले.
माजी विद्यार्थ्यांनी यापूर्वी मार्च महिन्यात झालेल्या स्नेहमेळाव्यात विद्यालयाला तीन सीसीटीव्ही कॅमेरे (डीव्हीआर मशीनसह), वॉटर फिल्टरसाठी दोन इलेक्ट्रिक मोटारी, दोन इलेक्ट्रिक फॅन तसेच विद्यार्थ्यांसाठी शैक्षणिक साहित्य व खाऊ असे एकूण २६ हजार रुपयांचे साहित्य भेट दिले होते. त्यावेळी दोन सेफ्टी डोअर देण्याचे आश्वासन दिले होते. त्याची पूर्तता करत आता २१ हजार रुपये किमतीचे दोन सेफ्टी डोअर विद्यालयाचे कर्मचारी बनकर मामा व पवार मामा यांच्याकडे सुपूर्द करण्यात आले.
कार्यक्रमाची सुरुवात कर्मवीर भाऊराव पाटील व सर्व महापुरुषांना अभिवादन करून झाली. त्यानंतर मान्यवरांच्या हस्ते रिबीन कापून सेफ्टी डोअरचे लोकार्पण करण्यात आले. स्थानिक समन्वय समितीचे ज्येष्ठ सदस्य गोपीनाथ भाऊ निळकंठ यांनी उपस्थित माजी विद्यार्थ्यांना मार्गदर्शन केले.
यावेळी माजी विद्यार्थी विकास खळे, दिगंबर कदम, सागर रोकडे, बाबासाहेब भारती व अर्चना गहिरे यांनी मनोगत व्यक्त केले. जिल्हा परिषद प्राथमिक शाळा कुंभारीच्या अध्यक्षपदी निवड झाल्याबद्दल विकास खळे यांचा सत्कार करण्यात आला. तसेच सेफ्टी डोअर देण्यासाठी विशेष योगदान देणारे दिगंबर कदम व बापू सोनवणे यांचाही सन्मान करण्यात आला. उपस्थित मान्यवरांसह सर्व माजी विद्यार्थ्यांना सन्मानचिन्ह देऊन गौरविण्यात आले.
कार्यक्रमाचे प्रास्ताविक ज्योती पवार (दहे) यांनी केले. सूत्रसंचालन अमित थोरात यांनी केले, तर रविराज भारती यांनी आभार मानले. शेवटी स्नेहभोजनाने कार्यक्रमाची सांगता झाली. यावेळी माजी विद्यार्थ्यांची मोठ्या संख्येने उपस्थिती होती.
