कोपरगाव प्रतिनिधी
कोपरगाव बस आगारातील बसची संख्या वाढवून प्रवाशांची गैरसोय दूर करण्यासाठी आमदार आशुतोष काळे यांनी राज्याचे परिवहन मंत्री प्रतापजी सरनाईक यांच्याकडे केलेल्या सातत्यपूर्ण पाठपुराव्याला यश आले आहे. त्यांच्या पाठपुराव्यातून यापूर्वी कोपरगाव आगाराला १० लालपरी आणि १२ जिजाऊ अशा एकूण २२ नवीन बस मिळाल्या असून, आता त्यात आणखी तीन जिजाऊ बसची भर पडली असून शनिवार (दि.२१) रोजी सायंकाळ पर्यंत दोन बस दाखल होणार असून उर्वरित एक बस पुढील आठवड्यात मिळणार आहे. त्यामुळे कोपरगाव आगाराच्या बस ताफ्याची क्षमता वाढणार असून प्रवाशांना दिलासा मिळणार आहे.
दिवाळीच्या सणानिमित्त सध्या बाहेरगावी जाणाऱ्या आणि येणाऱ्या प्रवाशांची संख्या वाढली आहे. त्यातच दिवाळीच्या सुट्ट्या संपल्यानंतर शाळा-महाविद्यालये सुरू होणार असल्याने ग्रामीण भागातून कोपरगाव शहरात शिक्षणासाठी येणाऱ्या विद्यार्थ्यांचीही मोठी वर्दळ राहणार आहे. बसची संख्या अपुरी असल्याने अनेकदा प्रवाशांना बसची प्रतीक्षा करावी लागत होती. विशेषतः शालेय व महाविद्यालयीन विद्यार्थ्यांना वेळेवर पोहोचण्यासाठी अडचणींचा सामना करावा लागत होता. आता दोन नवीन जिजाऊ बस उपलब्ध झाल्यामुळे गर्दीच्या मार्गांवरील वाहतुकीचा ताण कमी होण्यास मदत होणार आहे.
कोपरगाव आगारातील बसची अपुरी संख्या लक्षात घेऊन आमदार आशुतोष काळे यांनी नवीन बस उपलब्ध करून देण्यासाठी परिवहन मंत्र्यांकडे वेळोवेळी पाठपुरावा केला. त्यातून आतापर्यंत २२ नवीन बस मिळाल्या असून, आता आणखी दोन बस उपलब्ध झाल्याने आगाराच्या ताफ्यात एकूण २४ नवीन बसचा समावेश झाला असून पुढील आठवड्यात अजून एक बस आल्यानंतर बसची संख्या २५ वर पोहोचणार आहे. प्रवाशांना नियमित, सुरक्षित आणि अधिक सोयीस्कर बससेवा मिळावी, यासाठी आगाराला आणखी बस उपलब्ध करून देण्याबाबतही त्यांचा अविरतपणे पाठपुरावा सुरू आहे.नवीन बसमुळे महिला प्रवासी, विद्यार्थी, ज्येष्ठ नागरिक आणि ग्रामीण भागातील प्रवाशांची होणारी गैरसोय कमी होऊन सार्वजनिक वाहतूक व्यवस्था अधिक सक्षम होण्यास मदत होणार आहे.त्याबद्दल आमदार आशुतोष काळे यांनी राज्याचे मुख्यमंत्री देवेंद्रजी फडणवीस, उपमुख्यमंत्री श्रीम. सुनेत्राताई पवार, उपमुख्यमंत्री एकनाथजी शिंदे, राज्याचे परिवहन मंत्री प्रतापजी सरनाईक यांचे आभार मानले आहे.
