कोपरगाव प्रतिनिधी
कोपरगांव तालुक्यातील जेऊर कुंभारी येथील संजयनगर येथे आर पी आय आठवले प्रणित भीम साम्राज्यसेना यांचे वतीने डॉ. बाबासाहेब आंबेडकर मराठवाडा विद्यापीठ नामविस्तार दिन साजरा करतांना प्रथम डॉ. बाबसाहेब आंबेडकर स्मारकास पुष्पहार अर्पण करून अभिवादन करण्यात आले.
यावेळी बोलताना भीमसाम्राज्य सेनेचे संस्थापक व ग्रामपंचायत सदस्य प्रदिप गायकवाड म्हणाले की,बाबासाहेबांच नाव मराठवाडा विद्यापीठाला देण्यात यावे म्हणुन तब्बल १६ वर्ष चाललेल्या अविरत संघर्षाला न्याय मिळाला आणि १४ जानेवारी १९९४ ला मराठवाडा विद्यापीठाचे डॉ.बाबसाहेब आंबेडकर असा नामविस्तार करण्यात आला.ज्या भिमसैनिकांनी बाबासाहेबांच्या नावासाठी,आपल्या अस्मितेसाठी,रक्त सांडले,लढा दिला अशा तमाम निष्ठावंत भीम सैनिकांच्या लढ्याचा आणि बाबासाहेबांच्या विचारांचा विजय झाला तोच हा नामविस्तार दिन आहे. त्यानंतर महाराष्ट्रासह देशभरातील विविध राज्यातील जवळ जवळ १४ विद्यापीठांना महामानव डॉ. बाबासाहेब आंबेडकर यांचे नाव देऊन शासनाचे वतीने त्यांचा सन्मान करण्यात आला. खऱ्या अर्थाने शिका, संघटित व्हा, संघर्ष करा या उपदेशाने बाबासाहेबांनी सोशीत पीडित समाजात शैक्षणिक क्रांती घडवून आणली. महान शिक्षणप्रेमी आणि प्रकांड विद्वत्तेचे धनी असलेल्या बाबासाहेबांनी आपल्या आयुष्यामध्ये सर्वाधिक जोर शिक्षणावर दिला आणि शिक्षणाच्या आधारे मनुष्य उत्कर्ष करू शकतो असे सांगितले. बाबासाहेबांना “चालते-फिरते विद्यापीठ” म्हणतात, आणि असे त्यांच्या ठाई असलेल्या प्रचंड ज्ञानामुळे म्हटले जाते. आज विद्यापीठांसह, अनेक इन्स्टिट्यूट, शाळा, व महाविद्यालये यासारख्या अनेक शैक्षणिक संस्थांना डॉ. बाबासाहेब आंबेडकर यांचे नाव देण्यात आले आहे.आपल्या कोपरगांव तालुक्यात प्रथम महिला आमदार सौ. स्नेहलताताई कोल्हे यांचे विशेष प्रयत्नातून डॉ.बाबासाहेब आंबेडकर यांचे नावाने आद्ययावत व वैभवशाली अशी वाचनालयाची भव्य वास्तू निर्माण झाली आहे. हि तालुक्यासाठी अभिमानाची बाब आहे. डॉ. बाबासाहेबांचे नावाने सुरू होणारे हे सर्व सुविधायुक्त वाचनालय तालुक्यातील युवकांच्या उज्वल भविष्यासाठी उपयुक्त ठरणार असून कोपरगांव चे शैक्षणिक वैभवात भर पडणार आहे.असे मत यावेळी गायकवाड यांनी व्यक्त केले.
यावेळी प्रवीण गायकवाड यांनी उपस्थितांना नामविस्तार दिनाच्या व मकर संक्रांती चे शुभेच्छा दिल्या. यावेळी पप्पू गायकवाड, भारत गायकवाड, आकाश साळवे, रावसाहेब भालेराव,सचिन गायकवाड, महेश गायकवाड, अवि पगारे, उपाध्यक्ष दावीद धिवर, खंडू गांगुर्डे, ऋषी वक्ते ,विजू वक्ते, स्वप्नील भालेराव यांचेसह भीमसाम्राज्य सेनेचे सभासद कोरोना नियमांचे पालन करून उपस्थित होते. शाखाअध्यक्ष सागर गायकवाड, यांनी कार्यक्रमाचे प्रास्ताविक केले तर कार्याध्यक्ष सुमित पगारे यांनी आभार मानले.
