जेऊर कुंभारी वार्ताहर
जेऊर कुंभारी परिसरातील शिवाजी भिकाजी वक्ते यांच्या गोठ्यात बांधलेल्या बोकडावर बिबट्याने हल्ला करून त्याला फस्त केल्याची घटना बुधवारी सकाळी उघडकीस आली. या घटनेत वक्ते यांचे सुमारे दहा ते बारा हजार रुपयांचे आर्थिक नुकसान झाले असून, या घटनेमुळे परिसरातील शेतकरी व पशुपालकांमध्ये भीतीचे वातावरण निर्माण झाले आहे.
शिवाजी वक्ते हे सकाळी नेहमीप्रमाणे आपल्या गुरांना चारा देण्यासाठी गोठ्याकडे गेले असता गोठ्यात बांधलेला बोकड मृतावस्थेत आढळून आला. बोकडावर बिबट्याने हल्ला केल्याचे त्यांच्या निदर्शनास आले. रात्रीच्या सुमारास बिबट्याने गोठ्यात प्रवेश करून बाकड्यावर हल्ला केला असावा, असा अंदाज व्यक्त करण्यात येत आहे. या घटनेत त्यांचे मोठे आर्थिक नुकसान झाले आहे.
गेल्या काही दिवसांपासून जेऊर कुंभारी, डाऊच खुर्द, चांदेकसारे तसेच लगतच्या शेतवस्त्यांमध्ये बिबट्याचा वावर सातत्याने आढळून येत आहे. शेतामध्ये काम करणाऱ्या शेतकऱ्यांना तसेच रात्रीच्या वेळी पशुधनाची देखभाल करणाऱ्या पशुपालकांना बिबट्याच्या संचारामुळे मोठी चिंता निर्माण झाली आहे. शेतवस्त्यांवरील गोठ्यांमध्ये बांधलेल्या शेळ्या, बोकड व इतर पशुधनावर बिबट्यांकडून हल्ला होण्याची शक्यता वाढली आहे.
या परिसरात शेतीचे क्षेत्र मोठ्या प्रमाणावर असून अनेक शेतकऱ्यांचे वास्तव्य शेतवस्त्यांवर आहे. रात्रीच्या वेळी शेतकऱ्यांना शेतातील कामे तसेच पशुधनाची देखभाल करावी लागते. अशा परिस्थितीत बिबट्याचा वावर वाढल्याने शेतकरी व पशुपालकांच्या सुरक्षिततेचा प्रश्न निर्माण झाला आहे. त्यामुळे वनविभागाने केवळ घटना घडल्यानंतर पाहणी न करता बिबट्याचा वावर असलेल्या परिसरात नियमित गस्त वाढवावी, अशी मागणी शेतकऱ्यांकडून होत आहे.
दरम्यान, बिबट्याच्या वावरामुळे परिसरातील नागरिकांमध्ये भीतीचे वातावरण निर्माण झाले असून, भविष्यात मनुष्य किंवा मोठ्या प्रमाणावर पशुधनावर हल्ला होण्यापूर्वी वनविभागाने प्रतिबंधात्मक उपाययोजना कराव्यात, अशी मागणी जोर धरत आहे. बिबट्याच्या हालचालींचा मागोवा घेण्यासाठी आवश्यक ठिकाणी कॅमेरा ट्रॅप बसवावेत, तसेच बिबट्याचा वावर निश्चित झाल्यास नियमानुसार पिंजरा लावून त्याचा बंदोबस्त करावा, अशी मागणीही करण्यात येत आहे.तसेच जेऊर कुंभारी, डाऊच खुर्द व चांदेकसारे परिसरातील बिबट्याचा वाढता वावर लक्षात घेता वनविभागाने तातडीने ठोस उपाययोजना कराव्यात. शेतकरी व पशुपालकांच्या मनातील भीती दूर करण्यासाठी वनविभागाने गावकऱ्यांशी संपर्क साधून जनजागृती करावी आणि बिबट्याचा बंदोबस्त करावा, अशी मागणी ग्रामीण भागातून जोर धरत आहे.
