कोपरगाव प्रतिनिधी
कोपरगाव मतदारसंघ दुष्काळग्रस्त म्हणून जाहीर करण्यात आला असून मतदारसंघात ट्रिगर-१ लागू करण्यात आला आहे. त्यानुसार पीक नुकसानीचे पंचनामे सुरू झाले असून ही प्रक्रिया वेगाने व पारदर्शकपणे पूर्ण करा. राज्य शासनाकडून जाहीर करण्यात आलेल्या दुष्काळाच्या पार्श्वभूमीवर पंचनाम्यानुसार शेतकऱ्यांना जी मदत दिली जाणार आहे ती जास्तीत जास्त मदत शेतकऱ्यांना मिळवून द्या. त्याव्यतिरिक्त ज्या शेतकऱ्यांनी पिक विमा काढलेला आहे त्या शेतकऱ्यांच्या नुकसानीचे पंचनामे योग्य पद्धतीने करा. त्या शेतकऱ्यांच्या ज्या तक्रारी आहेत त्या तक्रारीचे निरसण करून त्यांना विमा कंपनीकडून देखील जास्तीत जास्त मदत मिळाली पाहिजे अशा पद्धतीने नियोजन करा अशा सूचना आ.आशुतोष काळे यांनी तहसीलदार महेश सावंत,तालुका कृषी अधिकारी मनोज सोनवणे व विमा कंपनीच्या प्रतिनिधींना दिल्या.पंचनाम्याच्या सुरू असलेल्या प्रक्रियेचा आढावा घेण्यासाठी आ.आशुतोष काळे यांनी गुरुवार (दि.१) रोजी तहसीलदार व तालुका कृषी अधिकाऱ्यांसमवेत बैठक घेतली. यावेळी त्यांनी पीक नुकसानीचे पंचनामे करताना कोणत्याही प्रकारची त्रुटी राहणार नाही, याची दक्षता घेण्याच्या सूचना दिल्या. ज्या शेतकऱ्यांनी पीक विमा काढला आहे, त्यांना विम्याचा लाभ मिळण्यासाठी वस्तुनिष्ठ व अचूक पंचनामे करून ते अहवाल तातडीने पीक विमा कंपनीकडे सादर करावेतअसे सांगितले.ई-पीक पाहणी झालेली असो अथवा नसो, बाधित पिकांचे पंचनामे करावेत. ज्या शेतकऱ्यांची ई-पीक पाहणी झालेली नाही, त्यांच्या प्रत्यक्ष शेतात जाऊन नुकसानीची पाहणी करून पंचनामा करावा. प्रत्येक बाधित क्षेत्राची अचूक नोंद घेऊन शासनाच्या मदतीपासून एकही पात्र शेतकरी वंचित राहणार नाही याची प्रशासनाने विशेष दक्षता घ्यावी.दुष्काळामुळे शेतकऱ्यांच्या हातातोंडाशी आलेला घास हिरावला गेला असून रब्बी हंगामावर देखील दुष्काळाचे सवत आहे अशा गंभीर दुष्काळी परिस्थितीमुळे शेतकरी मोठ्या आर्थिक संकटात सापडला आहे. त्यामुळे शासनाच्या निकषानुसार शेतकऱ्यांना मिळणारी जास्तीत जास्त मदत शेतकऱ्यांना मिळवून देण्यासाठी पंचनाम्याची प्रक्रिया गांभीर्याने व गतीने पूर्ण करावी. पीक विम्याचा लाभ मिळवून देवून शासनाची मदत प्रत्येक पात्र शेतकऱ्यापर्यंत पोहोचली पाहिजे. एकही शेतकरी नुकसान भरपाईपासून वंचित राहणार नाही, यासाठी प्रशासनाने संवेदनशीलतेने आणि युद्धपातळीवर काम करावे अशा सूचना त्यांनी तहसीलदार व तालुका कृषी अधिकाऱ्यांना दिल्या. शेतकरी बांधवांनी आपल्या पिकांच्या नुकसानीची नोंद वेळेत करून पंचनामा प्रक्रियेसाठी प्रशासनाला आवश्यक सहकार्य करावे व पिकांचे पंचनामे झाले याची खात्री करून घ्यावी असे आवाहन आ.आशुतोष काळे यांनी शेतकऱ्यांना केले आहे.
