कोपरगाव प्रतिनिधी
महाराष्ट्र बेसबॉल असोसिएशन व अहिल्यानगर जिल्हा बेसबॉल असोसिएशन यांच्या संयुक्त विद्यमाने तसेच जिल्हा क्रीडा कार्यालय अहिल्यानगर यांच्या सहकार्याने आयोजित ‘२० वी राज्यस्तरीय ज्युनिअर बेसबॉल क्रीडा स्पर्धा २०२६ चा आज मोठ्या उत्साहात आणि दिमाखदार सोहळ्यात समारोप झाला. साईदीप हिरोज क्रिकेट अकॅडमी बुरुडगाव रोड, अहिल्यानगर येथे पार पडलेल्या या स्पर्धेत अंतिम सामन्यात अमरावती जिल्ह्याने बाजी मारत विजेतेपद पटकावले.
या स्पर्धेत राज्यातील १७ जिल्ह्यांमधील एकूण ४३२ खेळाडूंनी आपला सहभाग नोंदवला. प्रत्येक सामना पाच इनिंगचा खेळवण्यात आला.
अमरावती विरुद्ध कोल्हापूर यांच्यात झालेला अंतिम सामना अत्यंत एकतर्फी ठरला. यात अमरावती संघाने कोल्हापूरचा ११-० असा दणदणीत पराभव करत प्रथम क्रमांक पटकावला, तर कोल्हापूर जिल्ह्याला द्वितीय क्रमांकावर समाधान मानावे लागले.
तृतीय क्रमांकासाठी यजमान अहिल्यानगर आणि रायगड यांच्यात अटीतटीची लढत झाली. यात अहिल्यानगर संघाने १३-९ अशा फरकाने विजय मिळवून तृतीय क्रमांक संपादन केला.
यावेळी महाराष्ट्र बेसबॉल संघटनेचे महासचिव राजेंद्र इखनकर यांनी खेळाडूंना मार्गदर्शन करताना असे सांगितले की बेसबॉल हा अत्यंत गतिमान आणि एकाग्रता वाढवणारा खेळ आहे. ग्रामीण व शहरी भागातील खेळाडूंना या स्पर्धेच्या माध्यमातून राज्यस्तरीय व्यासपीठ मिळाले आहे. खेळाडूंनी शिस्त आणि सातत्य ठेवल्यास ते राष्ट्रीय व आंतरराष्ट्रीय स्तरावर महाराष्ट्राचे नाव नक्कीच उज्ज्वल करतील.
जिल्हा क्रीडा अधिकारी अहिल्यानगर ज्ञानेश्वर खुरंगे यांनी आपले मनोगत व्यक्त करताना सांगितले की अहिल्यानगर जिल्ह्यामध्ये अशा राज्यस्तरीय स्पर्धांचे आयोजन होणे ही अभिमानाची बाब आहे. क्रीडा विभागाकडून खेळाडूंना आणि बेसबॉल असोसिएशनला सर्वतोपरी सहकार्य केले जाईल. सर्व खेळाडूंनी हार-जीत बाजूला ठेवून क्रीडा भावनेने पुढे जावे.असे ते म्हणाले.
या प्रसंगी अहिल्यानगर जिल्हा बेसबाँल असोसिएशन चे अध्यक्ष अरुण चंद्रे,महाराष्ट्र बेसबाँल असोसिएशन चे उपाध्यक्ष इंद्रजित नितीनवार, टेक्निकल कमिटीचे अध्यक्ष अशोक सरोदे,सदस्य रीजवान पठाण,मेजर घोडके अहिल्यानगर ऑलिम्पिक असोसिएशनचे सचिव शैलेश गवळी, क्रीडा मार्गदर्शक रेवन्नाथ शेलार यांच्यासह अनेक मान्यवर उपस्थित होते.
या स्पर्धात पंच म्हणून सोमनाथ सपकाळ, सोमनाथ नलावडे, आकाश साबणे, रेखा धनगर, आरती भगत, सायमा बागवान, रितू फ्रान्सिस, धनंजय शिरसाठ, विकी सायरसे, साक्षात धनगर, श्रीकांत सकपाळ, वैष्णवी फलके, केदार दिव्या आणि प्रथमेश गावडे यांनी पंच म्हणून उत्कृष्ट काम पाहिले.
या कार्यक्रमाचे प्रास्ताविक श्री. मकरंद को-हाळकर सहसचिव, महाराष्ट्र बेसबॉल असोसिएशन यांनी केले.तर कार्यक्रमाचे सूत्रसंचालन कल्पेश भागवत सहसचिव, अहिल्यानगर बेसबॉल असोसिएशन यांनी तर आभार सुधीर चपळगावकर उपाध्यक्ष, अहिल्यानगर जिल्हा बेसबॉल असोसिएशन यांनी मानले.
ही स्पर्धा यशस्वी करण्यासाठी हरी सानप, सागर कावळे, आकाश शिंदे, राहुल खाडे, आशिष मेहत्रे व उमेश वाघुले यांनी विशेषण परिश्रम घेतले व सहकार्य केले.
