जेऊर कुंभारी वार्ताहर
जेऊर कुंभारी परिसरातील पाटीलबा वक्ते यांच्या वस्तीवर गुरुवार, दि. २४ सप्टेंबर रोजी रात्री ८ वाजण्याच्या सुमारास दोन बिबट्यांचे दर्शन झाल्याने परिसरातील शेतकरी व ग्रामस्थांमध्ये भीतीचे वातावरण निर्माण झाले आहे. राहुल वक्ते व किरण पाटीलबा वक्ते यांनी बिबट्यांना पाहिल्याची माहिती दिली.
वस्तीवर त्यावेळी वीजपुरवठा खंडित असल्याने बॅटरीचा फोकस लावून पाहिले असता दोन बिबट्यांचा वावर निदर्शनास आला. फोकसचा प्रकाश पडताच बिबट्या जवळील मका पिकाच्या शेतात पळून गेला. त्यामुळे परिसरातील शेतकऱ्यांच्या सुरक्षिततेचा प्रश्न पुन्हा ऐरणीवर आला आहे.
एकीकडे पावसाअभावी दुष्काळाचे सावट, तर दुसरीकडे विजेचा सुरू असलेला लपंडाव आणि त्यात बिबट्यांचा वाढता वावर, अशा दुहेरी संकटात शेतकरी सापडला आहे. “शेतकऱ्यांनी जगावे तरी कसे?” असा सवाल सामाजिक कार्यकर्ते पाटीलबा वक्ते यांनी उपस्थित केला.
शेतकऱ्यांना रात्रीच्या वेळी पिकांची पाहणी, शेतीची कामे तसेच जनावरांची देखभाल करण्यासाठी शेतात जावे लागते. मात्र बिबट्यांच्या वावरामुळे शेतकऱ्यांना जीव मुठीत धरून शेतीची कामे करावी लागत आहेत. त्यामुळे वनविभागाने तातडीने घटनास्थळी पाहणी करून बिबट्यांच्या हालचालींचा मागोवा घ्यावा तसेच आवश्यक त्या ठिकाणी पिंजरा लावून बिबट्यांचा बंदोबस्त करावा, अशी मागणी पाटीलबा वक्ते यांनी केली आहे.
