कोपरगाव प्रतिनिधी
कोपरगाव मतदारसंघात पावसाचा प्रदीर्घ खंड पडल्यामुळे खरीप पिकांची अवस्था अत्यंत गंभीर झाली असून सोयाबीन,बाजरी,मका यांसह विविध पिकांची वाढ खुंटली आहे.सोयाबीन पीक शेंगा भरण्याच्या अवस्थेत असताना पावसाने मोठी ओढ दिल्याने शेतकऱ्यांच्या उत्पादनावर गंभीर परिणाम होणार आहे. त्यामुळे कोपरगाव मतदार संघातील वस्तुस्थितीचा गांभीर्याने विचार करून शेतकऱ्यांना जास्तीत जास्त नुकसान भरपाई मिळण्यासाठी शासनाने मदतीच्या निकषांमध्ये शिथिलता करून शेतकऱ्यांना सरसकट मदत द्यावी अशी मागणी आ.आशुतोष काळे यांनी राज्याचे कृषिमंत्री दत्तात्रय भरणे यांच्याकडे केली.नाशिक महसूल विभागाच्या आढावा बैठकीत आमदार आशुतोष काळे यांनी ऑनलाइन सहभागी होवून कोपरगाव मतदारसंघातील दुष्काळी परिस्थिती आणि शेतकऱ्यांच्या अडचणी राज्याचे कृषिमंत्री दत्तात्रय भरणे यांच्यापुढे सविस्तरपणे मांडल्या.पावसाचा मोठा खंड पडल्यानंतर केवळ एक दिवस सुमारे तीन मिलिमीटर पाऊस झाला.त्यामुळे कागदोपत्री पावसाचा खंड तुटला असला तरी प्रत्यक्ष शेतातील परिस्थितीमध्ये कोणताही सकारात्मक बदल झालेला नाही. पावसाच्या प्रमाणाबाबत कृषी विभागाने निश्चित केलेली अडीच मिलिमीटरची अट शिथिल करून ती किमान पाच मिलिमीटरपर्यंत करण्यात यावी, तरच प्रत्यक्ष नुकसान झालेल्या शेतकऱ्यांना नुकसान भरपाई मिळू शकते असे आ.आशुतोष काळे यांनी स्पष्ट केले.कोपरगाव तालुक्यात केवळ ४३.३९ टक्के शेतकऱ्यांनी ई-पिक पाहणी केली आहे. त्यामुळे ई-पिक पाहणीच्या अटीमुळे शेतकऱ्यांना मदतीपासून वंचित ठेवणे योग्य होणार नाही. प्रत्यक्ष पिकांची परिस्थिती आणि झालेल्या नुकसानीचा विचार करून ई-पिक पाहणीची अट शिथिल करावी व पात्र शेतकऱ्यांना सरसकट मदत देण्यात यावी, अशी मागणी त्यांनी केली.ऊसाची परिस्थितीही चिंताजनक असून पावसाअभावी ऊसाची वाढ खुंटली आहे. उपग्रहाच्या माध्यमातून पाहणी केल्यास ऊसाचे क्षेत्र हिरवे दिसत असले तरी प्रत्यक्ष शेतामध्ये परिस्थिती गंभीर आहे. शेतकऱ्यांकडे पिकांना पाणी देण्यासाठी पाण्याची उपलब्धता असली तरी विजेअभावी पिकांना पाणी देता येत नाही. प्रत्येक शेतकरी पिके वाचविण्यासाठी प्रयत्न करीत असूनही पावसाअभावी आणि वीजपुरवठ्यातील अडचणींमुळे पिकांची अवस्था दिवसेंदिवस गंभीर होत आहे. त्यामुळे केवळ उपग्रहावरील हिरव्या क्षेत्राच्या आधारे परिस्थितीचे मूल्यमापन न करता प्रत्यक्ष शेतातील वस्तुस्थिती विचारात घ्यावी असेही आ.आशुतोष काळे यांनी सांगितले.पाटबंधारे विभागाने रब्बी हंगामासाठी आवर्तनाच्या तारखा जाहीर केल्या असून एक डिसेंबरपासून रब्बीचे आवर्तन देण्यात येणार आहे. त्यानुसार जाहीर केलेल्या तारखांचे काटेकोरपणे पालन होणे आवश्यक आहे. आवर्तनाच्या नियोजनात कोणताही बदल झाल्यास त्याचा परिणाम पुढील पिकांवर होऊ शकतो. त्यामुळे ठरलेल्या वेळापत्रकानुसार पाणी मिळावे आणि पुढील रब्बी पिकांसाठी आवर्तनाचे योग्य नियोजन करण्यात यावे.यासाठी पाटबंधारे विभागाकडूनही दक्षता घेतली जावी अशी मागणी आ.आशुतोष काळे यांनी केली.
गंगापूर धरणातील पाणी कुंभमेळ्यासाठी आरक्षित केले जाणार असल्याचे जलसंपदा विभागाकडून सांगण्यात आले आहे. त्यामुळे कोपरगावसाठी यापूर्वी निश्चित करण्यात आलेल्या रोटेशननुसार कालव्याचे आवर्तन वेळेत मिळणे अत्यंत आवश्यक आहे. उपलब्ध पाण्याचे योग्य नियोजन करून शेतकऱ्यांच्या पिकांना त्याचा लाभ मिळेल, याची खबरदारी घेणे गरजेचे असल्याचे त्यांनी बैठकीत स्पष्ट केले.दरम्यान, शासनाच्या आकडेवारीनुसार कोपरगाव तालुक्यात २९ महिने पुरेल एवढा चारा उपलब्ध असल्याचे सांगण्यात आले आहे. मात्र प्रत्यक्ष उपलब्ध चारा आणि पशुधनाची संख्या विचारात घेतल्यास या आकडेवारीत तफावत असण्याची शक्यता आहे. केवळ क्षेत्रफळाच्या आधारे चाऱ्याची उपलब्धता निश्चित न करता प्रत्यक्ष उपलब्धता,चारा पिकांची सद्यस्थिती आणि पशुधनाची संख्या यांचा विचार करून वस्तुनिष्ठ आढावा घेण्याची गरज असल्याचे आ.आशुतोष काळे यांनी सांगितले.
कोपरगाव मतदारसंघातील पावसाचा प्रदीर्घ खंड, खरीप पिकांची खुंटलेली वाढ, सोयाबीनच्या शेंगा भरण्याच्या अवस्थेत निर्माण झालेली पाण्याची गरज, उसाची झालेली वाढ खुंटणे, विजेअभावी सिंचनात निर्माण होणाऱ्या अडचणी आणि आगामी रब्बी हंगामासमोरील संकट या सर्व बाबींचा गांभीर्याने विचार करता कोपरगावची परिस्थिती गंभीर झाली आहे. त्यामुळे कोपरगाव मतदारसंघ लवकरात लवकर दुष्काळग्रस्त जाहीर करून शेतकऱ्यांना जास्तीत जास्त मदत मिळण्यासाठी शासनाने तातडीने निर्णय घ्यावा. मदतीच्या तांत्रिक अटी शिथिल करून प्रत्यक्ष नुकसानीचा विचार करण्यात यावा आणि या भीषण परिस्थितीत एकही पात्र शेतकरी मदतीपासून वंचित राहू नये, अशी आग्रही मागणी आ.आशुतोष काळे यांनी कृषिमंत्री ना.दत्तात्रय भरणे यांच्याकडे केली.
ज्यावेळेस शासनाकडून एक रुपया पिक विमा योजना राबविण्यात येवून शेतकऱ्यांचा पीक विमा शासनामार्फत भरला जात होता त्यावेळी बहुतांश शेतकऱ्यांना पिक विम्याचा लाभ मिळत होता. मात्र सदरची योजना बंद झाल्यामुळे विमा उतरविण्यात ५०%घट झालेली आहे. त्यामुळे बहुतांशी शेतकरी पिक विम्या पासून वंचित राहणार आहे याची गांभीर्याने दखल घेणे गरजेचे आहे.प्रत्यक्षात कोपरगाव तालुक्यात आज अखेर ४३.३९% पीक पाहणी झालेली असून उर्वरित ५६% पीक पाहणी प्रलंबित आहे. शासन नियमाप्रमाणे ज्यांची पीक पाहणी झालेली आहे त्यांनाच नुकसान भरपाई रक्कम मिळते व बाकीचे शेतकरी वंचित राहतात. शेतकऱ्यांची ऑनलाइन १००% ई-पीक नोंदणी झालेली नाही. ऊस, फळबागा, चारा पीके, बाजरी, सोयाबीन, मका, कापूस, यासह सर्वच पिकांचे नुकसान झाल्यामुळे शेतकऱ्यांना मदत करणे आवश्यक आहे. पंचनामे करून पिकांची इगतवारी करण्यास विलंब होवू शकतो त्यामुळे तातडीने सरसकट मदत मिळणे आवश्यक असून पाटबंधारे विभागाची शेतकऱ्यांची थकीत पाणीपट्टी माफ करण्यात यावी अशी मागणी आमदार आशुतोष काळे यांनी या बैठकीत कृषिमंत्री ना.दत्तात्रय भरणे यांच्याकडे केली.
