कोपरगाव प्रतिनिधी
“आदिवासी संस्कृतीचा गौरव… एकतेचा उत्सव!” या ब्रीदवाक्याला सार्थ ठरवत सकल आदिवासी समाज, कोपरगाव यांच्या वतीने जागतिक आदिवासी दिन अत्यंत उत्साहात, पारंपरिक वातावरणात आणि सामाजिक उपक्रमांनी साजरा करण्यात आला.
दिवसाची सुरुवात सकाळी १०.०० वाजता कोपरगाव शहरातील आठवडे बाजार येथे महापुरुषांच्या प्रतिमेला पुष्पहार अर्पण करून झाली. त्यानंतर सकाळी ११.०० वाजता टाकळी येथील एकलव्य आश्रमशाळेत सर्व विद्यार्थ्यांना खाऊवाटप व शैक्षणिक साहित्याचे वाटप करण्यात आले. तसेच निसर्गसंवर्धनाचा संदेश देत आश्रमशाळा परिसरात वृक्षारोपण करण्यात आले.
सांजवेळी ६.०० वाजता समता नगर येथील योगाभवन येथे मुख्य कार्यक्रमाचे आयोजन करण्यात आले होते. मान्यवरांच्या हस्ते दीपप्रज्वलन व महापुरुषांच्या प्रतिमांचे पूजन करून कार्यक्रमाची सुरुवात झाली.
प्रास्ताविक, सूत्रसंचालन आणि विचारमंथन
कार्यक्रमाचे प्रास्ताविक रयत सेवक बँक (सातारा) चे संचालक दीपक भोये यांनी केले, तर सूत्रसंचालन के.के.गवळी सर यांनी अत्यंत प्रभावीपणे केले.
या वेळी समाजबांधवांना प्रबोधन करताना आदिवासी साहित्यिक व व्याख्याते संजय साबळे आणि निखिल सलामे यांनी शिक्षणाचे महत्त्व अधोरेखित केले. ते म्हणाले,
”आदिवासी समाजाला आज शिक्षणाची नितांत गरज आहे. शिक्षण हे वाघिणीचे दूध आहे. शिकलेल्या समाजबांधवांनी मागे वळून पाहत समाजातील शेवटच्या घटकाला शिक्षणाच्या प्रवाहात आणण्याची जबाबदारी स्वीकारली पाहिजे, तरच आपला आदिवासी समाज पुढे जाऊ शकेल.”
संस्कृतीचा जागर, गौरव आणि बक्षीस वितरण
कार्यक्रमादरम्यान आदिवासी मुलांनी सादर केलेल्या पारंपरिक लोकनृत्याने उपस्थित ६००आदिवासी बांधवांची मने जिंकली. शैक्षणिक, क्रीडा व विविध स्पर्धांमध्ये उल्लेखनीय कामगिरी करणाऱ्या गुणवंत विद्यार्थ्यांचा ट्रॉफी देऊन विशेष सत्कार करण्यात आला. तसेच समाजात प्रदीर्घ काळ शासकीय सेवा देऊन निवृत्त झालेल्या व निवृत्त होण्याच्या मार्गावर असलेल्या कर्मचाऱ्यांच्या योगदानाचा गौरव करण्यात आला.
कार्यक्रमाचे मुख्य आकर्षण ठरलेल्या ‘आदिवासी फॅन्सी ड्रेस’ स्पर्धेत लहान व मोठ्या गटातील विजेत्यांना प्रत्येकी तीन पारितोषिके देण्यात आली. तसेच महिलांसाठी आयोजित ‘लकी ड्रॉ’द्वारे ३ मानाच्या सेमी पैठणी साड्या मान्यवरांच्या हस्ते प्रदान करण्यात आल्या. कार्यक्रमाच्या शेवटी जमलेल्या सर्व आदिवासी बांधवांनी भोजनप्रसादाचा आस्वाद घेतला.
मान्यवरांची उपस्थिती
या सोहळ्याच्या अध्यक्षस्थानी न्यू इंग्लिश स्कूल (येसगाव) चे मुख्याध्यापक श्री. रंगनाथ ठाकरे सर होते.
प्रमुख पाहुणे म्हणून पोलीस उपनिरीक्षक बाळकृष्ण ठोंबरे, नायब तहसीलदार राजेश चौरे, सकल आदिवासी समाजाचे जिल्हाध्यक्ष व आयोजक अमित आगलावे, केंद्रप्रमुख आशिष पारडे, कृषी विभाग (कोपरगाव) च्या ज्ञानदेव ठाकरे व भारती ठाकरे मॅडम, ग्रामसेविका अहिरे मॅडम, महिला व बाल कल्याण पर्यवेक्षिका ठाकरे मॅडम, सेवानिवृत्त माध्यमिक शिक्षक चव्हाण महारू, आणि मनोहर शिंदे सर आदी मान्यवर व्यासपीठावर उपस्थित होते.
हा सोहळा यशस्वी करण्यासाठी सकल आदिवासी समाज कोपरगावच्या सर्व पदाधिकारी, कार्यकर्ते आणि समाजबांधवांनी विशेष परिश्रम घेतले. उपस्थितांनी दिलेल्या सहकार्याबद्दल शेवटी उपस्थितांचे आभार मानण्यात आले.
