जेऊर कुंभारी वार्ताहर
कोपरगाव तालुक्यातील जिल्हा परिषद प्राथमिक शाळा, गिरमेवस्ती येथील विद्यार्थिनी कु. समृद्धी प्रविण देवकर हिने इयत्ता पाचवी शिष्यवृत्ती परीक्षेत उल्लेखनीय यश संपादन करत अहिल्यानगर जिल्हा गुणवत्ता यादीत मानाचे स्थान पटकावले आहे. समृद्धीच्या या दैदिप्यमान यशामुळे गिरमेवस्ती गावासह संपूर्ण परिसरात आनंदाचे आणि अभिमानाचे वातावरण निर्माण झाले असून, शाळेच्या शैक्षणिक गुणवत्तेची पुन्हा एकदा प्रचिती आली आहे.
शिष्यवृत्ती परीक्षेसाठी समृद्धीने सातत्यपूर्ण अभ्यास, प्रचंड मेहनत आणि जिद्दीच्या बळावर उत्कृष्ट कामगिरी केली. तिच्या या उल्लेखनीय यशाबद्दल यादवराव शिवराम वक्ते विविध कार्यकारी सोसायटीचे चेअरमन दादासाहेब चव्हाण, समाजीक कार्यकर्ते कल्याण गुरसळ,पोलीस पाटील बाळासाहेब गायकवाड जेष्ठ, नागरिक किसन सोळके,
भाजपा युवा मोर्चा तालुका सचिव किशोर गायकवाड, समाजीक कार्यकर्ते कैलास चव्हाण,
द्वारकानाथ देवकर, प्रा.मधुकर वक्ते,
धनंजय देवकर, प्रविण देवकर
यांनी समृद्धीचा पुष्पगुच्छ देऊन सत्कार करत तिच्या उज्ज्वल भविष्यासाठी शुभेच्छा दिल्या. यावेळी उपस्थितांनी तिच्या यशाचे कौतुक करत भविष्यातही अशीच यशस्वी वाटचाल करण्याचा विश्वास व्यक्त केला.
समृद्धीच्या यशामागे तिचे सातत्यपूर्ण परिश्रम, पालकांचे मोलाचे प्रोत्साहन,तसेच मुख्याध्यापिका वंदना पर्वत,वर्गशिक्षक अनुज ढुमणे सर, शिक्षिका ज्योती गोरडे यांचे बहुमोल मार्गदर्शन लाभले. आणि शाळेने उपलब्ध करून दिलेले गुणवत्तापूर्ण शैक्षणिक वातावरण यांचा सिंहाचा वाटा असल्याची भावना व्यक्त होत आहे.
समृद्धीच्या या यशामुळे जिल्हा परिषद प्राथमिक शाळा, गिरमेवस्तीच्या शैक्षणिक परंपरेत आणखी एका मानाच्या यशाची भर पडली आहे. तिच्या यशामुळे गावातील विद्यार्थ्यांमध्ये स्पर्धा परीक्षांविषयी आत्मविश्वास निर्माण झाला असून, इतर विद्यार्थ्यांसाठीही ती प्रेरणादायी ठरली आहे.
