कोपरगाव प्रतिनिधी
ग्रामीण भागातील विद्यार्थ्यांनाही गुणवत्तापूर्ण शिक्षण देण्याच्या ध्येयाने वाटचाल करणाऱ्या जोगेश्वरी इंटरनॅशनल स्कूल, डाऊच खुर्द (ता. कोपरगाव) ने महाराष्ट्र राज्य परीक्षा परिषद, पुणे यांच्या फेब्रुवारी २०२६ मध्ये झालेल्या पूर्व उच्च प्राथमिक (इयत्ता ५ वी) व पूर्व माध्यमिक (इयत्ता ८ वी) शिष्यवृत्ती परीक्षेत दैदिप्यमान यश संपादन करत शैक्षणिक क्षेत्रात आपला ठसा उमटवला आहे. शाळेच्या विद्यार्थ्यांनी जिल्हा गुणवत्ता यादीत स्थान मिळवत तसेच शंभर टक्के निकालाची परंपरा कायम राखत संस्थेच्या गुणवत्तेची पुन्हा एकदा प्रचिती दिली आहे.
या परीक्षेत इयत्ता पाचवीतील कु. होन स्वरा सुनील हिने इंग्रजी माध्यमातून जिल्हा गुणवत्ता यादीत ३८ वा क्रमांक मिळवला असून तालुक्यात पाचवा क्रमांक पटकावण्याचा मान मिळवला आहे. तिच्या उल्लेखनीय यशामुळे संपूर्ण कोपरगाव तालुक्याचे लक्ष शाळेकडे वेधले गेले आहे.
तसेच इयत्ता आठवीतील कु. होन श्रावणी सुनील हिने रूरल ओबीसी प्रवर्गात जिल्हा गुणवत्ता यादीत तिसरा क्रमांक मिळवत आपल्या बुद्धिमत्ता व मेहनतीची छाप पाडली. विशेष म्हणजे तिने १०० टक्के गुणांसह हे यश मिळवून शाळेच्या शैक्षणिक गुणवत्तेला नवे शिखर गाठून दिले.
याशिवाय शिष्यवृत्ती परीक्षेत शाळेच्या अनेक विद्यार्थ्यांनी उल्लेखनीय यश संपादन केले. इयत्ता पाचवीमधून कु. गरुड माऊलीका शरद, कु. शिंदे उज्ज्वल निलेश, कु. जाधव ओम गणेश, कु. होन योगेश्वरी प्रकाश, कु. पवार शिवन्या चंद्रकांत, कु. होन आदिती सागर, कु. माकोने निर्भय दिलीप आणि कु. प्रजापत अनिल मनोज यांनी परीक्षा पात्रता मिळवली. तर इयत्ता आठवीमधून कु. माकोने धनश्री प्रविण आणि कु. जाधव सिद्धेश गणेश यांनीही उत्कृष्ट यश संपादन करून शाळेचा गौरव वाढविला.
या यशामागे विद्यार्थ्यांची जिद्द, पालकांचे सहकार्य आणि शिक्षकांचे सातत्यपूर्ण मार्गदर्शन हे महत्त्वाचे घटक ठरले. शाळेने वर्षभर नियोजनबद्ध सराव, नियमित चाचण्या, गुणवत्तावृद्धी उपक्रम आणि वैयक्तिक मार्गदर्शनाच्या माध्यमातून विद्यार्थ्यांची प्रभावी तयारी करून घेतली होती. त्याचेच फलित या निकालातून दिसून आले.
विद्यार्थ्यांच्या या अभूतपूर्व यशाबद्दल संस्थेचे अध्यक्ष, उपाध्यक्ष, सचिव, संचालक, मुख्याध्यापक, शिक्षक-शिक्षिका, शिक्षकेतर कर्मचारी तसेच पालकांनी विद्यार्थ्यांचे कौतुक करत त्यांच्या उज्ज्वल भविष्यासाठी शुभेच्छा दिल्या. शाळेच्या या यशामुळे परिसरात आनंदाचे वातावरण असून ग्रामीण भागातील विद्यार्थ्यांनाही योग्य मार्गदर्शन आणि दर्जेदार शिक्षण मिळाल्यास ते राज्यस्तरावरही उल्लेखनीय यश मिळवू शकतात, हे जोगेश्वरी इंटरनॅशनल स्कूलने पुन्हा एकदा सिद्ध करून दाखवले आहे.
