जेऊर कुंभारी वार्ताहर
समाजाप्रती असलेली आपली बांधिलकी जपत जेऊर कुंभारी येथील प्रगतशील शेतकरी विजय रोहम यांनी गावातील श्रद्धास्थान असलेल्या श्रीमंत मारुती मंदिरास खुर्च्यांची भेट देऊन समाजोपयोगी कार्याचा आदर्श निर्माण केला आहे.
मंदिरामध्ये विविध धार्मिक कार्यक्रम, कीर्तन, भजन तसेच सण-उत्सवाच्या काळात मोठ्या संख्येने भाविक उपस्थित राहत असतात. भाविकांना बसण्याची सुविधा उपलब्ध व्हावी आणि मंदिरातील कार्यक्रम अधिक सुकरपणे पार पडावेत, या उद्देशाने उपसरपंच जालिंदर चव्हाण यांनी मंदिरासाठी खुर्च्यांची आवश्यकता असल्याची मागणी केली होती. त्यांच्या या मागणीची दखल घेत विजय रोहम यांनी सामाजिक बांधिलकी जपत स्वखर्चातून खुर्च्यांची भेट देत ही गरज पूर्ण केली.
त्यांच्या या उपक्रमामुळे मंदिरात येणाऱ्या भाविकांना, विशेषतः ज्येष्ठ नागरिकांना मोठा दिलासा मिळणार असून ग्रामस्थांकडून या कार्याचे स्वागत करण्यात येत आहे. धार्मिक आणि सामाजिक क्षेत्रात अशा प्रकारचे योगदान प्रेरणादायी ठरत असल्याची भावना उपस्थितांनी व्यक्त केली.
खुर्च्यांच्या हस्तांतरणप्रसंगी आरपीआय प्रदेश सचिव दिपकराव गायकवाड, उपसरपंच जालिंदर चव्हाण, कोंडीराम वक्ते, विक्रम वक्ते, नितीन इंगळे आदींसह ग्रामस्थ उपस्थित होते. यावेळी उपस्थितांनी विजय रोहम यांच्या सामाजिक बांधिलकीचे कौतुक करत त्यांचे अभिनंदन केले. तसेच श्रीमंत मारुती मंदिर समितीच्या वतीने त्यांच्याप्रती कृतज्ञता व्यक्त करण्यात आली.
गावातील धार्मिक व सामाजिक उपक्रमांना बळकटी देण्यासाठी नागरिकांनी पुढाकार घेण्याची गरज असून, विजय रोहम यांच्या या उपक्रमामुळे समाजापुढे एक प्रेरणादायी आदर्श निर्माण झाल्याची भावना ग्रामस्थांकडून व्यक्त करण्यात आली.
