नागरे परिवाराकडून सत्कार; परदेशातही अनुभवली घरच्या मातीची ऊब!!
जेऊर कुंभारी वार्ताहर
विधान परिषद सदस्य तथा कोपरगाव तालुक्याचे लोकप्रिय युवा नेतृत्व आ. विवेकभैय्या कोल्हे यांच्या अमेरिका दौऱ्यादरम्यान न्यूयॉर्क येथे मराठमोळ्या आपुलकीचा अविस्मरणीय अनुभव आला. जेऊर कुंभारी गावचे सुपुत्र आकाश संजय नागरे यांच्या निवासस्थानी झालेल्या सदिच्छा भेटीत परदेशातही आपल्या मातीचा सुगंध आणि संस्कारांची उब अनुभवायला मिळाली.
जागतिक स्तरावर महत्त्वाच्या मानल्या जाणाऱ्या वर्ल्ड ट्रेड सेंटर परिसरात कार्यरत असलेले आकाश नागरे हे लहानभाऊ नागरे यांचे नातू असून, परदेशात राहूनही त्यांनी आपल्या गावाशी आणि संस्कृतीशी असलेले नाते जपल्याचे या भेटीत प्रकर्षाने जाणवले.
या प्रसंगी आ. विवेकभैय्या कोल्हे यांनी आकाश नागरे यांचे वडील संजय नागरे तसेच त्यांच्या मातोश्री यांच्याशी मनमोकळ्या गप्पा मारत गाव, समाज आणि परदेशातील मराठी बांधवांच्या जिव्हाळ्याच्या विषयांवर चर्चा केली. हजारो किलोमीटर दूर अमेरिकेत असतानाही नागरे परिवाराने केलेले आत्मीय स्वागत आणि स्नेहपूर्ण पाहुणचार यामुळे संपूर्ण वातावरण अगदी घरगुती झाले होते.
विशेष म्हणजे, नागरे परिवाराने प्रेमाने वाढलेल्या अस्सल महाराष्ट्रीयन भोजनामुळे आ. विवेकभैय्या कोल्हे यांना परदेशातही घरच्या जेवणाची चव अनुभवायला मिळाली. अनेक दिवसांच्या प्रवासात हॉटेलमधील जेवणानंतर मिळालेली ही मराठमोळी मेजवानी केवळ भोजन नव्हती, तर ती आपल्या संस्कारांची, मायेममतेची आणि मातृभूमीशी असलेल्या नात्याची जाणीव करून देणारी ठरली.
परदेशात स्थायिक झाल्यानंतरही आपल्या संस्कृतीचे जतन करत मातृभूमीशी असलेली नाळ घट्ट ठेवणाऱ्या नागरे परिवाराचे आ. विवेकभैय्या कोल्हे यांनी विशेष कौतुक केले. “जगाच्या कुठल्याही कोपऱ्यात गेलो तरी मराठी माणसातील प्रेम, जिव्हाळा आणि आपलेपणा कधी कमी होत नाही,” अशा भावना यावेळी व्यक्त करण्यात आल्या.
दरम्यान, विधान परिषद सदस्य म्हणून निवड झाल्याबद्दल नागरे परिवाराच्या वतीने आ. विवेकभैय्या कोल्हे यांचा सत्कार करण्यात आला. यावेळी शुभेच्छांचा वर्षाव करत पुढील राजकीय आणि सामाजिक वाटचालीस शुभेच्छा देण्यात आल्या. नागरे परिवाराने व्यक्त केलेल्या प्रेमाबद्दल आणि सन्मानाबद्दल आ. विवेकभैय्या कोल्हे यांनी मनःपूर्वक आभार मानले.
