कोपरगाव प्रतिनिधी
राज्यातील नामांकित व आशियातील अग्रगण्य शैक्षणिक संस्था म्हणून ओळख असलेल्या रयत शिक्षण संस्थेच्या मॅनेजिंग कौन्सिल सदस्यपदी ॲड. संदीपभाऊ वर्पे यांची निवड झाल्याने शैक्षणिक, सामाजिक व राजकीय क्षेत्रातून त्यांच्यावर अभिनंदनाचा वर्षाव होत आहे. त्यांच्या निवडीमुळे कोपरगाव तालुक्याच्या शैक्षणिक क्षेत्राला नवे बळ मिळणार असल्याची भावना विविध स्तरांतून व्यक्त होत आहे.
रयत शिक्षण संस्था ही ग्रामीण भागातील विद्यार्थ्यांना गुणवत्तापूर्ण शिक्षण उपलब्ध करून देणारी संस्था म्हणून राज्यभर प्रसिद्ध आहे. अशा संस्थेच्या मॅनेजिंग कौन्सिल सदस्यपदी ॲड. संदीपभाऊ वर्पे यांची निवड होणे ही तालुक्यासाठी अभिमानाची बाब मानली जात आहे. शिक्षण, सामाजिक कार्य व संघटन कौशल्याच्या जोरावर त्यांनी अनेक क्षेत्रांत आपला ठसा उमटविला असून त्यांच्या अनुभवाचा फायदा संस्थेच्या प्रगतीसाठी निश्चितपणे होणार असल्याचा विश्वास व्यक्त केला जात आहे.
या निवडीबद्दल माजी सभापती शिवाजी वक्ते, महर्षी शंकरराव कोल्हे कारखान्याचे संचालक संजय होन
यांनी ॲड. संदीपभाऊ वर्पे यांचा सत्कार करून पुढील वाटचालीस शुभेच्छा दिल्या. यावेळी त्यांनी बोलताना, रयत शिक्षण संस्थेच्या माध्यमातून ग्रामीण विद्यार्थ्यांना अधिक दर्जेदार शिक्षण, आधुनिक सुविधा व विकासाच्या नव्या संधी उपलब्ध करून देण्यासाठी ॲड. वर्पे यांचे योगदान महत्त्वपूर्ण ठरेल, असा विश्वास व्यक्त केला.
सत्काराला उपस्थित मान्यवरांनीही ॲड. संदीपभाऊ वर्पे यांच्या निवडीचे स्वागत करत ही निवड तालुक्याच्या शैक्षणिक प्रगतीसाठी प्रेरणादायी ठरेल, असे मत व्यक्त केले.
यावेळी विविध सामाजिक, शैक्षणिक व राजकीय क्षेत्रातील पदाधिकारी, कार्यकर्ते व नागरिक मोठ्या संख्येने उपस्थित होते. ॲड. संदीपभाऊ वर्पे यांनी सर्वांचे आभार मानत, रयत शिक्षण संस्थेच्या माध्यमातून विद्यार्थीकेंद्रित व समाजाभिमुख कार्य करण्यासाठी आपण कटिबद्ध राहणार असल्याची भावना व्यक्त केली.
