युग कुडाळे करणार अमेरिकेत भारताचे प्रतिनिधित्व!!
जेऊर कुंभारी वार्ताहर
कोपरगावच्या शैक्षणिक क्षेत्रासाठी अभिमानाची बातमी ठरत, जेऊर कुंभारी येथील
श्री चैतन्य टेक्नो स्कूलचा विद्यार्थी युग दिनार कुडाळे याची प्रतिष्ठित ISDC २०२६ या आंतरराष्ट्रीय कार्यक्रमासाठी निवड झाली आहे. विशेष म्हणजे, त्याला अमेरिकेचा (US) तब्बल १० वर्षांचा व्हिसा देखील प्राप्त झाला असून, आता तो वॉशिंग्टन डी.सी., अमेरिका येथे भारताचे प्रतिनिधित्व करणार आहे.
युगच्या या यशामुळे श्री चैतन्य टेक्नो स्कूलसह संपूर्ण कोपरगाव शहरात आनंदाचे वातावरण निर्माण झाले आहे. सातत्यपूर्ण मेहनत, शैक्षणिक गुणवत्ता आणि जागतिक स्तरावर स्वतःची ओळख निर्माण करण्याची जिद्द यांच्या जोरावर युगने ही उल्लेखनीय कामगिरी साध्य केली आहे.
ISDC 2026 या जागतिक दर्जाच्या कार्यक्रमात सहभागाची संधी मिळणे ही अत्यंत अभिमानास्पद बाब मानली जात असून, युग आता आंतरराष्ट्रीय व्यासपीठावर भारतीय विद्यार्थ्यांचे प्रतिनिधित्व करताना दिसणार आहे. त्याच्या या यशामुळे इतर विद्यार्थ्यांनाही नवी प्रेरणा मिळणार असून, ग्रामीण भागातील विद्यार्थ्यांमध्येही जागतिक संधींबाबत सकारात्मक दृष्टी निर्माण होणार आहे.
विद्यार्थ्यांच्या सर्वांगीण विकासासाठी, आधुनिक शिक्षणपद्धतीसाठी आणि जागतिक स्तरावरील संधी उपलब्ध करून देण्यासाठी श्री चैतन्य टेक्नो स्कूल सातत्याने प्रयत्नशील असल्याचे पुन्हा एकदा अधोरेखित झाले आहे. युगच्या यशामुळे शाळेच्या शैक्षणिक गुणवत्तेत आणखी एक मानाचा तुरा रोवला गेला आहे.
या उल्लेखनीय यशाबद्दल शाळेच्या प्राचार्या सौ. विद्या विश्वनाथन, अकॅडमिक डीन श्री. सागर पाटील, शिक्षकवृंद तसेच व्यवस्थापनाने युग दिनार कुडाळे याचे अभिनंदन करत त्याच्या उज्ज्वल भविष्यासाठी शुभेच्छा दिल्या.
“कोपरगावचा विद्यार्थी आता जागतिक मंचावर भारताचे प्रतिनिधित्व करत जिल्हा आणि राज्याचे नाव उज्ज्वल करणार आहे,” अशा भावना यावेळी व्यक्त करण्यात आल्या.
