जेऊर कुंभारी वार्ताहर
२१ जून गिरमेवस्ती येथील जिल्हा परिषद प्राथमिक शाळेत आज जागतिक योग दिन अत्यंत उत्साहात साजरा करण्यात आला. या निमित्ताने विद्यार्थ्यांना योगाचे महत्त्व समजावून सांगण्यात आले आणि विविध योगासनांची प्रात्यक्षिके घेण्यात आली.
कार्यक्रमाची सुरुवात शिक्षक अनुज ढुमणे यांच्या मनोगताने झाली त्यांनी योगाचे प्रात्यक्षिक करून दाखविले. त्यांनी ‘योग असे जेथे, रोग नसे तेथे’ या उक्तीतून योगाचे आरोग्यासाठी असलेले महत्त्व विशद केले. त्यानंतर शिक्षक आणि विद्यार्थ्यांनी मिळून विविध योगासने सादर केली. यामध्ये ताडासन, वृक्षासन, भुजंगासन, वज्रासन यांसारख्या प्रमुख आसनांचा समावेश होता. प्रत्येक आसनाचे महत्त्व आणि ते योग्य पद्धतीने कसे करावे, याबाबत शिक्षकांनी विद्यार्थ्यांना सविस्तर मार्गदर्शन केले.
योगाच्या माध्यमातून शरीर आणि मन कसे स्वस्थ राहते, याचे प्रात्यक्षिक विद्यार्थ्यांनी स्वतः अनुभवले. योगासनांनंतर सर्वांनी एकत्रितपणे ध्यानधारणा केली, ज्यामुळे विद्यार्थ्यांना मनःशांती आणि सकारात्मक ऊर्जा अनुभवता आली.
याप्रसंगी शाळेच्या मुख्याध्यापिका प्रियांका जोशी यांनी आपल्या मनोगतातून “नियमित योग – निरोगी जीवन” असा महत्त्वाचा संदेश दिला. तसेच, शिक्षक सुदाम साळुंके यांनी योग दिनाचे महत्त्व आणि त्याचे फायदे याविषयी माहिती देऊन सर्व विद्यार्थ्यांना योग दिनाच्या हार्दिक शुभेच्छा दिल्या.
