जेऊर कुंभारी प्रतिनिधी
कोपरगाव तालुक्यातील जिल्हा परिषद प्राथमिक शाळा, गिरमेवस्ती (जेऊर कुंभारी) येथील तंत्रस्नेही व उपक्रमशील शिक्षक सुदाम साळुंके यांनी डिजिटल शिक्षणाच्या क्षेत्रात उल्लेखनीय कामगिरी करत ‘AFE-CSTEACHER’ या ऑनलाईन ब्लेंडेड कोर्स 2024-25 मध्ये टॉप ५ मध्ये स्थान पटकावत कोपरगाव तालुक्याचे नाव उज्ज्वल केले आहे.
‘अमेझॉन फ्युचर इंजिनिअर’ (Amazon Future Engineer – AFE) आणि ‘लीडरशिप फॉर इक्विटी’ (Leadership for Equity – LEF) यांच्या संयुक्त विद्यमाने जिल्हा शिक्षण व प्रशिक्षण संस्था, संगमनेर आणि जिल्हा परिषद प्राथमिक शिक्षण विभाग, अहिल्यानगर यांच्या सहकार्याने हा अभ्यासक्रम राबविण्यात आला. जिल्हाभरातून निवड झालेल्या २० शिक्षकांमध्ये सुदाम साळुंके यांनी आपल्या प्रभावी सहभागाने पहिल्या पाचमध्ये स्थान निश्चित केले.
या यशस्वी शिक्षकांचा सन्मान करण्यासाठी सोमवार, दिनांक २१ एप्रिल २०२५ रोजी हॉटेल राज पॅलेस, अहिल्यानगर येथे एका विशेष गौरव समारंभाचे आयोजन करण्यात आले होते. या कार्यक्रमाला जिल्ह्याचे कर्तव्यदक्ष शिक्षणाधिकारी भास्कर पाटील, डायट संगमनेरचे ज्येष्ठ अधिव्याख्याता रामेश्वर लोटके, SSA चे लेखाधिकारी व IT विभाग प्रमुख श्री. रमेश कासार, शिक्षण विस्तार अधिकारी कार्ले मॅडम, तसेच AFE व LEF प्रकल्पांचे प्रमुख श्री. रविराज निंबाळकर आणि समन्वयक प्रदीप शिंदे यांची उपस्थिती लाभली.
या समारंभात २० शिक्षकांना सन्मानित करण्यात आले. त्यातील ४ ते १० क्रमांक प्राप्त शिक्षकांना Del कंपनीचे लॅपटॉप व सन्मानपत्र देऊन गौरविण्यात आले.सुदाम साळुंके यांनी टॉप ५ मध्ये स्थान मिळवून गिरमेवस्ती शाळेचा आणि संपूर्ण कोपरगाव तालुक्याचा सन्मान वाढवला. मान्यवरांनी त्यांचे मनःपूर्वक अभिनंदन करत पुढील वाटचालीस शुभेच्छा दिल्या.
शिक्षणाधिकारी मा. श्री. भास्कर पाटील यांनी मार्गदर्शन करताना डिजिटल शिक्षणाचे महत्त्व अधोरेखित केले. शिक्षकांनी तंत्रज्ञानाचा प्रभावी वापर करत अशा नाविन्यपूर्ण उपक्रमांमध्ये सक्रीय सहभाग नोंदवावा, असे आवाहन त्यांनी यावेळी केले.
सुदाम साळुंके यांच्या या प्रेरणादायी यशामुळे कोपरगाव तालुक्यातील शिक्षकवर्गात नवचैतन्य निर्माण झाले असून, डिजिटल शिक्षणाच्या दिशेने टाकलेले हे पाऊल इतर शिक्षकांसाठी मार्गदर्शक ठरत आहे.
