कोपरगाव प्रतिनिधी
9 सप्टेंबर हा दिवस संपूर्ण जगभरात जागतिक तलवारबाजी दिन म्हणून साजरा करण्यात येतो. याचे औचित्य साधून कोपरगाव येथील तलवारबाजी प्रशिक्षण केंद्र, समर्थ स्पोर्ट्स अकॅडेमीच्यावतीने शालेय गट आणि खुल्या गटाच्या तलवारबाजी स्पर्धेचे आयोजन करण्यात आले होते. या स्पर्धा इंडोर गेम हॉल कोपरगाव येथे घेण्यात आल्या आणि विजयी – उपविजयी खेळाडूंना पदके देण्यात आले.
या स्पर्धेसाठी कोपरगाव येथील संजीवनी इंग्लिश मीडिअम स्कूल, संजीवनी अकॅडेमी, संत जनार्दन स्वामी महर्षी स्कूल, के. बी. रोहमारे ज्युनिअर कॉलेज, श्री. गो. विद्यालय, बी. एम. टी. स्कूलमधील एकूण 45 मुला-मुलींनी सहभाग घेतला होता. या स्पर्धा साखळी पद्धतीने घेण्यात आल्या आणि प्रथम, द्वितीय आणि तृतीय विजयी खेळाडूंना पदके देण्यात आली. या स्पर्धेच्या बक्षीस वितरण समारंभप्रसंगी समर्थ स्पोर्ट्स अकॅडेमीचे संस्थापक अध्यक्ष शिवछत्रपती पुरस्कार विजेते दिलीप घोडके, उपाध्यक्ष बाबासाहेब गवारे, असिफ शेख, अविनाश निकम, माजी सैनिक निवृत्ती मुरडणर, दीपक कसाब आदी मान्यवर उपस्थित होते. याप्रसंगी दिलीप घोडके खेळाडूंना आवाहन करताना म्हणाले, प्रत्येक खेळाडूकडे स्वतःचे वैयक्तिक साहित्य असणे गरजेचे आहे. त्यामुळे सर्व करताना आणि पुढील स्पर्धा या इलेक्ट्रॉनिक साहित्यावर असल्याने स्वतःचे साहित्य असणे अत्यंत गरजेचे आहे. तसेच माजी सैनिक निवृत्ती मुरडणर म्हणाले, खेळ खेळाल्याने आपले शरीर तंदुरुस्त राहते व जीवनात अपयश पचविण्याची क्षमता निर्माण होते. स्पर्धेच्या यशस्वीतेसाठी आणि पंच म्हणून राहुल रुईकर, कार्तिक मोरे, आर्यन घोडके, अखिलेश ठोंबरे यांनी काम पाहिले. सूत्रसंचालन तन्मय साबळे यांनी केले तर आभार विद्यापीठ खेळाडू सार्थक बडजाते यांनी मानले.
