जेऊर कुंभारी वार्ताहर
जेऊरकुंभारी येथे समृद्धी महामार्गालगत खड्ड्यात पडलेल्या घोड्यास ग्रामस्थांनी जीवदान दिले आहे.
जेऊरकुंभारी गावात अज्ञात इसमाने घोडा आणून सोडला होता. गावातील नागरिक विशेषतः विद्यार्थी व घोडा यांचे विशेष ऋणानुबंध झाले होते. शाळकरी मुले शाळा सुटल्यावर घोडसवारी करत असत. एकूणच हा घोडा ग्रामस्थांचा आवडता बनला आहे. मात्र हा घोडा दोन दिवसांपासून अचानक गायब झाल्याने ग्रामस्थ घोड्याच्या बाबतीत चिंतेत होते. मात्र आज सकाळी येथील नागरिक नारायण गुरसळ यांना हा घोडा समृद्धी महामार्गालगत खड्ड्यात पडलेला आढळला. त्यांनी घोड्यास बाहेर काढण्याचा प्रयत्न केला मात्र खड्ड्यात चिखल असल्याने घोडा फसलेला असल्याने त्यांना यश आले नाही. त्यामुळे योगेश जाधव, सागर गुरसळ, विजय वक्ते, सुनिल गायकवाड यांच्या मदतीने घोड्याला सुखरूप बाहेर काढण्यात यश आले.
घोड्यास बाहेर काढण्यात आल्यानंतर डाॅक्टरांच्या मदतीने प्राथमिक उपचार करण्यात आले.
जेऊर कुंभारी गावात समुद्धी महामार्गाच्या पुलाचे काम पुर्ण झाले आहे. पुलाच्या कडेला मोठ मोठे खोल खड्डे केलेले आहे ते समुद्धी महामार्गाचे काम करतांना बुजवले नाहीत. त्यात पावसाचे व पाटाचे पाणी साचल्यानंतर त्याला विहीरीचे स्वरूप प्राप्त होते. त्यामुळे या पुलाखालून जाताना ग्रामस्थ व शाळकरी मुले यांना जिकारीचे झाले आहे. त्यामुळे भविष्यात
एखादी दुर्घटना झाली तर याला जबाबदार कोण? असा प्रश्न नागरिकांनी विचारला आहे.
