हॅरिसन ब्रँच शालेय मंत्रिमंडळ निवडणूकीसाठी ईव्हीएम चा वापर!!

शिक्षकांच्या या उपक्रमाचे तहसीलदार संदिप भोसले यांनी केले कौतुक!!

जेऊर कुंभारी वार्ताहर

“हॅरिसन ब्रँच शालेय मंत्रिमंडळ निवडणूकीसाठी ईव्हीएम चा वापर” झालात ना चकीत! हो हे खरे आहे.कोपरगाव तालूक्यातील जेऊर कुंभारी गावातील हॅरिसन ब्रँच च्या जिल्हा परिषद शाळेत नुकतीच शालेय मंत्रिमंडळाची निवडणूक झाली.या निवडणूकीत शाळेच्या मुख्याध्यापिका रंजना डोंगरे व शाळेतील उपक्रमशील शिक्षक श्री.नवनाथ सुर्यवंशी सर यांनी वोटिंग मशिन या ॲन्ड्राॕईड ॲपचा वापर करून दोन टॅबच्या सहाय्याने कंट्रोल युनिट व बॅलेट युनिट असा वापर करून मतदान घेतले.
आपला भारत देश हा लोकशाहीप्रधान देश आहे.आपल्या देशापासून तर गावापर्यंतचा कारभार पाहण्यासाठी जनतेतून लोकप्रतिनिधी निवडणूक प्रक्रिया राबवून निवडून दिलेले असतात.हॕरिसन ब्रँच शाळेत एकूण ५ पदासाठी ही निवडणूक प्रक्रिया राबविण्यात आली.निवडणूकीच्या आदल्या दिवशी नामनिर्देशन फॉर्म भरून घेऊन उमेदवारांची नावे नोंदविण्यात आले.निवडणूकीतून माघार घेण्याची वेळही देण्यात आली.तसेच उमेदवारांना निवडणूक चिन्हे दिल्यानंतर प्रचाराला जोरात सुरुवात झाली.बीएलओ म्हणून गणेश बर्डे याने मतदार यादी अपडेट करण्याचे काम केले.अखेर सायंकाळी उद्याच्या मतदानाची वेळ दुपारी ३ वाजताची ठरविण्यात आली.शाळेच्या कार्यालयात मतदान कक्ष उभारण्यात आला.
निवडणूकीच्या दिवशी दुपारी मॉक पोल सर्व उमेदवार व उमेदवार प्रतिनिधी समोर घेण्यात आले.यावेळी जेऊर कुंभारी गावच्या सरपंच सुवर्णाताई पवार,शाळा व्यवस्थापन अध्यक्ष सतिष पवार,विजय लकारे, मधुकर वक्ते,शैलेश दळवी,संजय दळवी,ज्ञानेश्वर देवकर,संतोष जाधव व शिक्षक उपस्थित होते.सदर निवडणूक प्रक्रियेत एकूण ५ जागांसाठी १० विद्यार्थी उमेदवार निवडणूक रिंगणात उतरले होते.प्रत्येक मतदार पाच जागांसाठी मतदान करत होता.मतदारही रांगेत येऊन मतदान करत होते.मतदान अधिकारी १ मतदाराचे विद्यार्थी हजेरीतील नाव व आयकार्ड पाहून ओळख पटवत होते.मतदान अधिकारी क्र.२ विद्यार्थ्यांच्या बोटावर शाई लावत होता.तर मतदान अधिकारी क्र.३ कंट्रोल पॅनल वरील बॅलेट बटन दाबून मतदाराला मतदान कक्षाकडे मतदानाला पाठवीत होते.
हॅरिसन ब्रँच शाळेचा इयत्ता १ ते ४थीचा पट ३५ असून १००% उपस्थिती दररोज असते.व आज मतदानही १००% झाले.ठिक ४ वाजता मतदानाची वेळ संपल्यावर क्लोज बटन दाबून मतदान प्रक्रिया संपली.केंद्राध्यक्ष शर्वरी मोरे, मतदान अधिकारी, करण पवार,राशी माळी व महेश मोरे यांनी कंट्रोल युनिट,बॅलेट युनिट व इतर साहित्य मुख्याध्यापकांमार्फत निवडणूक निर्णय अधिकारी नायब तहसीलदार मनिषा कुलकर्णी मॅडम यांच्या कडे व सहाय्यक निवडणूक अधिकारी राहुल शिरसाठ यांच्या ताब्यात दिले.निकालासाठी त्यांनी रिझल्ट बटन दाबून स्क्रीनवर दिसणारा निकाल प्रत्येक उमेदवाराच्या नावासह अहवाल डाऊनलोड केला.तोपर्यंत सर्व मतदार विद्यार्थी व उमेदवार विद्यार्थ्यांना शालेय पोषण आहार व पूरक आहार देण्यात आला.विद्यार्थी उमेदवार चिंतेत दिसत होते.त्यांना निवडणूक निकाल काय लागेल याची प्रतिक्षा होती. सर्व विद्यार्थ्यांना शाळेच्या मैदानावर बोलावून घेण्यात आले व सर्वांच्या उपस्थितीत नायब तहसीलदार मनिषा कुलकर्णी यांनी निवडणूकीचा निकाल जाहिर करण्यास सुरुवात केली.निवडणूक जिंकलेले विद्यार्थी निकाल येताच एकच जल्लोष करत होते.एकूणच काय तर “कहीं खूशी तो कहीं गम” अशी परिस्थिती दिसत होती.सर्व निकाल जाहीर झाल्यानंतर मान्यवरांच्या हस्ते निवडून आलेली शाळेची मुख्यमंत्री उमेजा शेख,उपमुख्यमंत्री शिफा शेख,स्वच्छ्ता मंत्री-शिवराज माळी,परिपाठ मंत्री-विनोद देवकर,आरोग्यमंत्री श्रावणी डोखे या सर्वांना गुलाबपुष्प देऊन मान्यवरांच्या हस्ते अभिनंदन करण्यात आले.तसेच विद्यार्थ्यांनी मतदान जनजागृतीविषयी घोषणा देऊन मतदानाचे महत्व उपस्थितांना पटवून दिले.
सदर निवडणूक प्रक्रीया कोपरगाव तहसीलच्या नायब तहसीलदार मनिषा कुलकर्णी यांच्या देखरेखीखाली पार पडली.यावेळी जेऊर कुंभारी गावच्या सरपंच सुवर्णा पवार व शाळा व्यवस्थापन समिती अध्यक्ष सतिष पवार,विजय लकारे गावातील ग्रामस्थ व पालक उपस्थित होते. निवडणूक प्रक्रियेनंतर उपस्थित सर्वांचे आभार मुख्याध्यापिका रंजना डोंगरे यांनी मानले. सदर उपक्रम सुंदर रित्या आयोजन व नियोजन केल्याबद्दल पंचायत समिती गटविकास अधिकारी सचिन सूर्यवंशी साहेब व गटशिक्षणाधिकारी शबाना शेख यांनी विद्यार्थी,शिक्षक,मुख्याध्यापक व पालकांचे कौतुक केले आहे.

विद्यार्थ्यांना निवडणूक प्रक्रिया कशी असते,तसेच जनतेतूनच लोकप्रतिनिधी कशा पद्धतीने निवडला जातो याबद्दल माहिती मिळावी व विद्यार्थ्यांचा शैक्षणिक,सामाजिक तसेच सर्वांगीण विकास व्हावा या हेतूने हा उपक्रम शाळेत राबविण्यात आला.शाळेत अशाप्रकारचे नाविन्यपूर्ण उपक्रम नेहमीच पालक व ग्रामस्थांच्या सहकार्याने राबविले जातात.”
शिक्षक नवनाथ सूर्यवंशी विद्यार्थ्यांना निवडणूक प्रक्रिया कशी असते,तसेच जनतेतूनच लोकप्रतिनिधी कशा पद्धतीने निवडला जातो.याचे प्रात्यक्षिकच विद्यार्थी व पालकांना आज हॅरिसन ब्रँच शाळेत आधुनिक तंत्रज्ञानाचा वापर करून अनुभवण्यास मिळाले.विद्यार्थी गुणवत्ता व सर्वांगीण विकासाचे सर्व उपक्रम या शाळेत शाळेतील दोघेही उपक्रमशील शिक्षक राबवीत असल्याने त्यांचे हार्दिक अभिनंदन !”