कोपरगाव प्रतिनिधी
जेऊर कुंभारी येथील ग्रामसेवकाच्या मनमानी कारभारास काळे गटाचे सदस्य वैतागले असून दप्तर तपासणी करावी या सदस्यांच्या मागणीस गटविकास अधिकारी टाळाटाळ करीत असल्याचा सदस्यांनी आरोप केला आहे.
ग्रामसेवक मनमानी कारभार करतात, त्यांच्या व्यवहारात अनिमियतता आहे, दप्तर दाखवत नाहीत, माहिती अधिकार अर्ज केला तरी त्याला केराची टोपली दाखवतात असा आरोप काळे गटाचे विद्यमान सदस्य अनिता बाबासाहेब गायकवाड, किशोर मनोहर वक्ते, धनश्री नामदेव वक्ते यांनी केला आहे. याबाबत खुद्द गटविकास अधिकारी यांनी स्वतः दप्तर तपासणी करून सदस्यांचा संशय दूर करावा अशी मागणी त्यांचेकडे करण्यात आली आहे. मात्र तीन आठवडे उलटूनही त्यांचेकडून कुठलीही कार्यवाही झालेली नाही. त्यामुळे गटविकास अधिकारी ग्रामसेवकास अभय देत आहेत का?असा प्रश्न निर्माण झाला आहे.
जेऊरकुंभारी ग्रामपंचायत मध्ये महिला सदस्य संख्या जास्त आहे. दरमहा बैठक परिपत्रकात
अंदाजपत्रक व झालेला खर्च याबाबत माहिती ग्रामसेवक गोपनीय ठेवतात. हजेरी पुस्तक ठेवत नाहीत, दबाव आणून प्रोसिडिंग वर सह्या घेतल्या जातात, सह्या न केल्यास महिला सदस्यांना बैठकीस बसू दिले जाणार नाही अशी धमकी दिली जाते, विचारणा केली असता उडवाउडवीची उत्तरे दिली जातात अशी तक्रार महिला सदस्य व ग्रामस्थांनी गटविकास अधिकारी सचिन सूर्यवंशी यांचेकडे वारंवार करूनही दखल घेतली जात नाही. लोकनियुक्त सदस्यांना कर्मचारी धमकी देतात हा कुठला न्याय झाला? ग्रामसेवक सेवानिवृत्त होत असल्याने त्यांना वाचवण्याचा प्रयत्न तर नाही ना? असा सदस्यांना संशय असून याबाबत गटविकास अधिकारी यांनी तातडीने निर्णय व निस्पक्ष चौकशी न केल्यास काळे गटाचे निवडून आलेले सदस्य राजीनामे देतील असा इशारा ग्रामपंचायत सदस्य अनिता बाबासाहेब गायकवाड, किशोर मनोहर वक्ते, धनश्री नामदेव वक्ते यांनी प्रसिद्धी पत्रकान्वये दिला आहे.
