कोपरगाव प्रतिनिधी
इयत्ता पहिली प्रवेश पात्र विद्यार्थ्यांसाठी जि प प्रा शाळा हॅरिसन ब्रँच येथे शाळा पूर्वतयारी मेळावा क्र.१ चे आयोजन करण्यात आले होते.
नवीन शैक्षणिक धोरण अंतर्गत निपुण भारत या कार्यक्रमाची अंमलबजावणी सुरु होत आहे.यामध्ये राज्यात स्टार्स प्रकल्पाची अंमलबजावणी सुरु असून त्याअंतर्गत शाळा पूर्व तयारी अभियान राबवले जात आहे.
या कार्यक्रमाद्वारे सन २०२३-२४ मध्ये इ.१ली मध्ये दाखल होणाऱ्या विद्यार्थ्यांना अध्ययनाची गोडी लागावी,त्यांना शाळेविषयी आवड निर्माण व्हावी.यासाठी शिक्षक, पालक व अंगणवाडी सेविका या सर्वांच्या मदतीने शाळा स्तरावर मेळावे आयोजित करून विद्यार्थ्यांच्या अध्ययन क्षमता पाहता येणार आहेत. या निमित्ताने हॅरिसन ब्रँच शाळेत आज पहिल्या मेळाव्याचे आयोजन करण्यात आले होते.या मेळाव्याचे उदघाटन जेऊर कुंभारी गावाच्या प्रथम नागरिक सुवर्णा पवार यांच्या हस्ते करण्यात आले.
मेळाव्यातील उल्लेखनीय बाबी मध्ये प्रवेशपात्र विद्यार्थ्यांचे गुलाब पुष्प देऊन स्वागत करण्यात आले.मेळाव्यातील सर्व विदयार्थी, पालक व अधिकारी वर्गाचे आकर्षण बिंदू ठरलेल्या सहा फूट उंचीच्या दोन शिसपेन्सिल सर्वांचे लक्ष वेधून घेत होत्या.
मेळाव्याच्या ठिकाणी वेगवेगळ्या प्रकारचे सात स्टॉल मांडण्यात आले होते.त्या विविध स्टॉलवर साहित्याची मांडणी करण्यात आली होती.सर्व पालक व पाहुण्यांच्या उपस्थितीत दाखलपात्र मुलांच्या पालकांसह प्रत्येक स्टॉलला भेट देऊन त्या ठिकाणी मुलांच्या विविध क्षमता तपासण्यात आल्या.व त्या क्षमतांची नोंद विकास कार्डामध्ये करण्यात आली.सदर प्रसंगी सरपंच सुवर्णाताई पवार,शाळा व्यवस्थापन समिती अध्यक्ष संदिप पवार,ग्रामपंचायत सदस्य यशवंत आव्हाड,शाम पवार, सतिष पवार, अंगणवाडी ताई उपस्थित होते.केंद्रप्रमुख सुनिल घुले यांनी शाळेत राबविल्या जाणाऱ्या उपक्रमांचे कौतुक करून नवीन शैक्षणिक वर्षासाठी शिक्षक व विद्यार्थ्यांना शुभेच्छा दिल्या.कार्यक्रमाचे प्रास्ताविक शाळेचे मुख्याध्यापक नवनाथ सूर्यवंशी यांनी केले.उपस्थितांचे आभार मानून कार्यक्रमाचा समारोप मनिषा शिंपी यांनी केला.
