कोपरगाव प्रतिनिधी
दि.१८ जानेवारी ते २० जानेवारी ओम गुरुदेव इंग्लिश मिडीयम स्कूल कोपरगाव येथे नुकतेच ५० वे तालुकास्तरीय गणित-विज्ञान प्रदर्शन पार पडले.या प्रदर्शनात सुनिता इंगळे यांनी प्राथमिक शिक्षक गटात शैक्षणिक साहित्य निर्मिती अंतर्गत ”वेस्ट इज बेस्ट’ या उपक्रमात पन्नास प्रकारचे साहित्य निर्मिती केली होती.संपूर्णतः टाकाऊ वस्तूपासून टिकाऊ साहित्य निर्मिती करण्यात आली होती.
गटविकास अधिकारी सचिन सूर्यवंशी यांच्या हस्ते,के.जे.सौमय्या काॕलेजचे प्राध्यापक श्री.सोनवणे,गटशिक्षणाधिकारी शबाना शेख,केंद्रप्रमुख,केंद्रसमन्वयक,विषय तज्ञ,शिक्षक यांच्या प्रमुख उपस्थितीत त्यांना सन्मानित करण्यात आले.
वर्गात अध्यापन करताना सातत्याने नवनवीन प्रयोग त्या राबवत असतात.वर्गातही अध्यापन करताना विद्यार्थ्यांना अभ्यासातील संकल्पना साहित्याच्या मदतीने समजावून देत असतात.सन २०११ पासून त्या सातत्याने या प्रदर्शनात सहभाग घेऊन तालुकास्तर,जिल्हास्तर,राज्यस्तरांपर्यंत त्यांनी यश मिळविले आहे.नुकत्याच जिल्हास्तरीय जिल्हा शिक्षण व प्रशिक्षण संस्था,संगमनेर आयोजित नवोपक्रम स्पर्धेत ही त्यांच्या उतारावाचन नवोपक्रमास चौथा क्रमांक मिळाला आहे. उतारावाचन उपक्रम संपूर्ण राज्यातील विद्यार्थ्यांना उपयुक्त ठरत आहे. शासनाचे कोणत्याही प्रकारचे अनुदान नसतानाही फक्त विद्यार्थी गुणवत्ता विकास हे ध्येय डोळ्यांसमोर ठेवून त्या सातत्याने स्वखर्चातून साहित्य निर्मिती करत असतात.विद्यार्थी अध्ययनातील समस्या लक्षात ठेवून साहित्य निर्मिती असल्याने ते विद्यार्थ्यांना उपयुक्त ठरत आहे.शैक्षणिक साहित्य निर्मितीत त्यांचा हातखंडा असून राज्यात एक नवी ओळख निर्माण केली आहे.लाॕकडाऊन कालावधी ते आतापर्यंत विविध शाळांना उपयुक्त असे स्वलिखित ‘शालेय परीपाठ प्रश्नमंजुषा’ या पुस्तकाच्या वीस हजार रुपये किंमतीच्या तीनशे प्रती त्यांनी मोफत भेट दिल्या आहेत. सातत्याने सामाजिक बांधिलकी जपत त्यांचे उपक्रम चालू असतात.या यशाबद्दल सर्वच स्तरातून त्यांचे कौतुक होत आहे.
