कोपरगाव प्रतिनिधी
सिंहस्थ कुंभमेळ्याचे प्रमुख मार्गदर्शक ब्रम्हलिन स्वामी सागरानंद सरस्वती आणि तीनखणीचे ब्रम्हलिन संत रामदासीबाबा हे दोघेही पराकोटीचे संत होते, कोकमठाण पंचक्रोशी आणि रामदासीबाबा भक्त मंडळाने भक्तीचा सागरानंद पुस्तक प्रकाशित करून अपारप्रेमभाव व्यक्त केला असे प्रतिपादन श्री तपोनिधी आनंद आखाड्याचे कोषाध्यक्ष व गुरुकुल सेवा आश्रमाचे शंकरानंद सरस्वती महाराज यांनी केले.ब्रम्हलिन संत रामदासीबाबा यांच्या तेहतिसाव्या पुण्यतिथीची सांगता सोमवारी गोदावरी धामचे ह.भ.प. सुदामगिरी यांचे काल्याचे किर्तनाने झाली, नेवासा येथील सेवानिवृत्त शिक्षक रंगनाथ किसन डहाळे सर व रामदासीबाबा भक्त मंडळाने लिहीलेल्या भक्तीचा सागरानंद पुस्तकाचे प्रकाशन शंकरानंद सरस्वती, श्री पंचदशनाम जुना आखाडाचे अजीवन ठाणाधिपती भागवतानंदगिरीजी, समर्थभक्त प्रसादबुवा रामदासी, श्री १०८ जुना आखाड्याचे सचिव पिनाकेश्वर महाराज, गिरीजानंद सरस्वती महाराज, रामानंद सरस्वती, नवनाथ महाराज, कृष्णा महाराज, रामदास महाराज वाघ, सोमनाथ महाराज, सुर्यकांत महाराज, संजीवनी एज्युकेशन सोसायटीचे कार्याध्यक्ष नितीनदादा कोल्हे आदिंच्या हस्ते करण्यांत आले त्याप्रसंगी ते बोलत होते. श्री. शंकरानंद सरस्वती महाराज पुढे म्हणाले की, कोकमठाण आणि त्र्यंबकेश्वर या नगरीचा एकमेकांचा अतुट संबंध आहे. श्रीक्षेत्र कोकमठाणची भुमी पवित्र असुन ब्रम्हालिन संत रामदासी बाबा यांनी येथे केलेली साधना भारतभरातील तमाम साधु- संत महंत यांना कोकमठाणनगरीत घेऊन येते. येथील उर्जा तुम्हा-आम्हांला सतत संस्काराची जाणिव करून देते. सागरानंद महाराज आणि रामदासीबाबा व अन्य साधुसंत महंताचा सत्संग नेहमीच त्यांच्या आठवणींना उजाळा देतो. कोकमठाणवासियांनी सागरानंद सरस्वती महाराजांवरील प्रेम भक्तीचा सागरानंद पुस्तक रूपाने व्यक्त करून ऋणात टाकले आहे.ब्रम्हलिन संत रामदासीबाबांचा पुण्यतिथी उत्सव संस्कार महोत्सव असुन त्यातून प्रत्येकाला अध्यात्म ज्ञानाची शिदोरी मिळते. त्यातून भावी पिढी घडते. सागरानंद सरस्वती महाराजांनी संपूर्ण भारत देशातील कुंभमेळ्याला शिस्तीचे दर्शन घडविले आहे.समर्थभक्त प्रसादबुवा रामदासी म्हणाले की, हिंदवी स्वराजाचे संस्थापक छत्रपती शिवाजी महाराज आणि सज्जनगड स्थित समर्थ रामदास स्वामी यांना अभिप्रेत असलेल्या हिंदुराष्ट्रासाठी त्यांनी जीव ओतून काम केले, त्याची प्रचिती कोकमठाणच्या ब्रम्हलिन संत रामदासी बाबां पुण्यतिथी कार्यक्रमांत नेहमीच होते. श्री १०८ पिनाकेश्वर महाराज म्हणाले की, सागरानंद सरस्वती, रामदासी बाबा यांच्यात मित्रत्वाचे नाते होते, हे दोघेही सिद्ध पुरुष होते. उपस्थीत हजारो भाविकांना यावेळी बुंदी व मसालेभाताचा महाप्रसाद देण्यांत आला.सिंहस्थ कुंभमेळ्याचे प्रमुख मार्गदर्शक व दहा आखाड्याचे प्रमुख स्वामी सागरानंद सरस्वती महाराजांच्या कार्य व्यासंगाचे भक्तीचा सागरानंद पुस्तकाचे रामदासी बाबांच्या तेहतिसाव्या पुण्यतिथी सांगता सोहळ्यात कोकमठाण येथे शंकरानंद सरस्वती महाराज गोदावरी धामचे सुदामगिरी महाराज, समर्थ भक्त प्रसादबुवा रामदासी, श्री पंचदशनाम जुना आखाड्याचे अजीवन ठाणाधिपती भागवतानंद गिरीजी महाराज, पिनाकेश्वर महाराज, लेखक रंगनाथ डहाळे यांच्या हस्ते सोमवारी झाले.
