कोपरगाव प्रतिनिधी
संत हे समाजाचे दुःख हरण करून अत्यंत साध्या पध्दतींने भक्तीमार्ग सांगतात तो सर्वांनी आत्मसात करावा असे प्रतिपादन तीर्थक्षेत्र निमगांव शिर्डी येथील श्री श्री १००८, साई ज्ञानेश्वर महाराज मंदिर वारकरी शिक्षण संस्थेचे संस्थापक महामंडलेश्वर काशिकानंद महाराज यांनी केले. तालुक्यातील श्रीक्षेत्र कोकमठाण येथे ब्रम्हलिन संत रामदासीबाबा यांच्या ३३ व्या पुण्यतिथीनिमीत्त किर्तन महोत्सवाचे आयोजन करण्यांत आले असुन त्याचे तिसरे पुष्प ११ जानेवारी रोजी निळोबारायाच्या अभंगाने गुंफण्यांत आले त्याप्रसंगी ते बोलत होते. महामंडलेश्वर काशिकानंद महाराज पुढे म्हणाले की, या धर्तीवर वेद, उपनिषदे, ग्रंथ आदि धार्मीक साहित्यातुन परमेश्वराच्या अस्तित्वाची जाणिव होते. ग्रंथ हे गुरू असुन तेच भक्तीमार्गाचा प्रकाश वंचितांच्या जीवनांत निर्माण करत असतात. परमेश्वरी सेवेतुन संत महंत ज्ञानी जनांनी भक्तीमार्ग अत्यंत सोप्या शब्दात तुम्हा आम्हाला सांगितला आहे. ब्रम्हलिन संत रामदासीबाबा यांनी अध्यात्म संस्काराची देवघेव गीता, रामरक्षा, मारूती स्तोत्र, हरिपाठ, आदितुन केली. योग अध्यात्म हया अवघड शब्दांची फोड करून दुःखीतांच्या जीवनांत छोटयाशा दैवी साधनेतुन आनंद निर्माण कसा होईल याबददल सातत्याने प्रबोधन केले. कलीयुगात प्रत्येकाच्या मुखात देवाचे नामस्मरण व्हायला बराच काळ जातो त्यासाठी संत महंत हे त्याची शिकवण देत असतात. भौतिक सुविधा मोठया प्रमाणात वाढल्याने प्रत्येकाचे आयुर्मान कमी कमी होत चालले आहे. युवा पिढी आणि त्यांचे माता पिता भ्रमणध्वनीच्या विळख्यात गुंतत चालले आहेत, मुलांच्या अभ्यासाकडे दुर्लक्ष होत आहे, परिणामी आध्यात्म क्षेत्राकडेही काहीसे दुर्लक्ष झाले आहे. कोकमठाणच्या पंचकोशीत रामदासीबाबांचा ३३ वा पुण्यतिथी सोहळा साजरा होतांना किर्तनसेवेचे पुष्प गुंफले जात आहे ही समाधानाची बाब आहे.तालुक्यातील ब्रम्हलिन संत रामदासीबाबा ऊर्फ शंकर हरिभाउ कोल्हटकर यांचा व आपला अनेकवेळा संबंध आला ते एक महापुरूष होते. रामदासीबाबांसमोर एकदा किर्तनसेवा सादर करण्याची संधी मिळाली, आपल्यातील उणीवा दुर करण्याची प्रेरणाही त्यांच्याकडुन घेतली. तालुक्यातील श्रीक्षेत्र कोकमठाण येथे ब्रम्हलिन संत रामदासीबाबा यांच्या ३३ व्या पुण्यतिथीनिमीत्त किर्तन महोत्सवात महामंडलेश्वर काशिकानंद महाराज यांनी तिसरे पुष्प गुंफले.
