कोपरगाव प्रतिनिधी
कोपरगाव रेल्वे स्टेशन व कोपरगाव विधानसभा मत्तदार संघातील रेल्वे प्रवाशांना व नागरिकांना येत असलेल्या अनेक समस्यांबाबत श्री साईबाबा संस्थानच्या विश्वस्त मंडळाचे अध्यक्ष ना. आशुतोष काळे यांनी रेल्वेचे अपर महाप्रबंधक बी.के. दादाभोय यांची मुंबई येथे त्यांच्या कार्यालयात समक्ष भेट घेवून रेल्वेच्या विविध समस्यांकडे त्यांचे लक्ष वेधले व त्याबाबत त्यांना सविस्तर निवेदन देखील दिले आहे.
दिलेल्या निवेदनात ना. आशुतोष काळे यांनी कोपरगाव रेल्वे स्टेशन व रेल्वेच्या बाबतीत अनेक समस्या मांडल्या आहेत. यामध्ये शिरसगाव येथील येथील पादचारी प्रवाशांना कोपरगाव शहरात येण्यासाठी दूरच्या भुयारी मार्गातून यावे लागते. नागरिकांची हि अडचण लक्षात घेवून सदर नागरिकांसाठी रेल्वेचा पादचारी मार्ग तयार करून द्यावा. कोपरगाव रेल्वे स्टेशनवर ए.टी.एम. मशीन उपलब्ध करून द्यावे. शिंगणापूर ते टाकळी फाटा या रेल्वेच्या हद्दीतील रस्त्याचे काम करण्यासाठी रेल्वेकडून एन.ओ.सी. मिळावी. प्रस्तावित कोपरगाव – रोटेगाव रेल्वे लाईनचा सर्वे पूर्ण झाला असून पुढील कार्यवाही लवकरात लवकर करण्यात यावी. भविष्यातील अनुचित घटना रोखण्यासाठी शिर्डी व कोपरगाव रेल्वे स्टेशनला श्वानपथकाची नियुक्ती करावी. यशवंतपूर – निजामुद्दीन संपर्कक्रांती एक्स्प्रेस व यशवंतपूर – चंदिगढ संपर्क क्रांती एक्स्प्रेसला कोपरगाव रेल्वे स्टेशनला थांबा देण्यासाठी हुबळी विभागाने मान्यता दिली असून मुंबई मध्य रेल्वेनेही सदर गाड्यांना कोपरगाव स्टेशनला थांबा देण्यास मान्यता द्यावी. कोपरगाव मतदासंघात पावसाळ्यात भुयारी रेल्वे मार्गात पाणी साचून प्रवाशांना अनेक अडचणींना सामोरे जावे लागते, ही अडचण सोडवण्यासाठी येणाऱ्या पावसाळ्यापूर्वी योग्य त्या उपाय योजना कराव्या. कोपरगाव रेल्वे स्टेशनवर पाण्याची व्यवस्था करण्यासाठी जलशुद्धीकरण प्रकल्प उभारावा, भुयारी मार्गात सीसीटीव्ही व स्ट्रीट लाईट बसवावे. गोवा एक्स्प्रेस, झेलम एक्स्प्रेस व कर्नाटक एक्स्प्रेसमध्ये कोपरगाव स्टेशनचा आरक्षण कोटा वाढवून द्यावा आदी मागण्या दिलेल्या निवेदनात करण्यात आल्या असून अपर महाप्रबंधक बी.के. दादाभोय यांनी सदरच्या अडचणी लवकरात लवकर सोडविण्यासाठी सकारात्मक प्रतिसाद दिला आहे. यावेळी रेल्वे प्रश्नांचे अभ्यासक देवांग बनकर उपस्थित होते.रेल्वेच्या विविध समस्यांबाबत रेल्वेचे अपर महाप्रबंधक बी.के. दादाभोय यांच्याशी चर्चा करतांना ना.आशुतोष काळे.
