कोपरगाव प्रतिनिधी
कोपरगाव तालुक्यातील राजकीयदृष्ट्या अत्यंत महत्वाच्या असणाऱ्या नाटेगाव विविध सेवा सोसायटीची निवडणूक नुकतीच पार पडली. या निवडणुकीत माजी आमदार अशोकराव काळे व श्री साईबाबा संस्थानच्या विश्वस्त मंडळाचे अध्यक्ष ना. आशुतोष काळे यांच्या मार्गदर्शनाखाली काळे गटाचे १० सदस्य निवडून आले असून काळे गटाने मागील ३८ वर्षापासूनचे या सोसायटीवरील आपले वर्चस्व अबाधित ठेवले आहे.
नाटेगाव सोसायटी मागील ३८ वर्षापासून काळे गटाच्या ताब्यात आहे. यावेळी पार पडणाऱ्या निवडणुकीत विरोधकांनी हि सोसायटी ताब्यात घेण्यासाठी प्रयत्नांची पराकाष्ठा करून सर्व प्रकारचे डावपेच वापरून सोसायटी ताब्यात घेण्याचा चंग बांधला होता. मात्र माजी आमदार अशोकराव काळे व ना. आशुतोष काळे यांच्या मार्गदर्शनाखाली आजवरच्या कार्यकाळात संस्थेच्या संचालक मंडळाने केलेल्या उत्कृष्ठ कामगिरीच्या बळावर सभासदांनी पार पडलेल्या निवडणुकीत विरोधकांनी हि सोसायटी ताब्यात घेण्यासाठी केलेल्या प्रयत्नांना सुरुंग लावत पुन्हा एकदा काळे गटाकडे सत्ता दिली आहे.
एकूण १३ सदस्य असलेल्या नाटेगाव सोसायटीत १० सदस्य काळे गटाचे तर ३ सदस्य विरोधी गटाचे निवडून आले आहेत. विरोधी गटाचे जे सदस्य निवडून आले आहेत ते देखील काठावर निवडून आले आहेत. त्यामुळे सर्वच्या सर्व जागा जरी काळे गटाच्या निवडून आल्या नसल्या तरी काळे गटाने आपले वर्चस्व अबाधित ठेवले आहे. मात्र दुसरीकडे विरोधकांना दुधाची तहान ताकावर भागावी लागल्याचे चित्र नाटेगाव सोसायटीच्या निवडणुकीत दिसून आले आहे. काळे गटाचे विजयी उमेदवार पुढीलप्रमाणे मोरे गणेश वसंतराव, मोरे बाळू पोपट, मोरे सतीश कारभारी, मोरे अंबादास धोंडीबा, पिंगळे भारती रावसाहेब, मोरे घमा सुकदेव, सौ. मोरे लीलाबाई तान्हाजी, सौ. मोरे रंजना रघुनाथ, मोरे संतोष इंद्रभान, भालके भरत छबुराव. सर्व विजयी उमेदवारांचे व निवडणुकीत विजयश्री मिळविण्यासाठी परिश्रम घेणाऱ्या सर्व कार्यकर्त्यांचे माजी आमदार अशोकराव काळे व ना. आशुतोष काळे यांनी अभिनंदन केले आहे.
