कोपरगाव प्रतिनिधी
कोपरगांव विधानसभा मतदार संघातील सर्व ग्रामपंचायती अंतर्गत प्रधानमंत्री आवास योजनेअंतर्गत घरकुले मंजुर झालेली आहेत मात्र या ड वर्ग लाभार्थ्यासाठीचे निकष जाचक असल्याने त्याचा प्रत्यक्ष लाभ मिळवितांना अनेक अडचणी उदभवणार आहेत आणि मुळ लाभार्थी यापासून वंचित राहणार आहे तेव्हा ड वर्ग लाभार्थ्यासाठीचे निकष बदलावेत अशी मागणी बहादराबादचे सरपंच विक्रम पाचोरे व अकरा गांवचे सरपंच व उपसरपंच यांनी तहसिलदार विजय बोरूडे व गटविकास अधिकारी सचिन सुर्यवंशी यांना एका निवेदनाद्वारे केली आहे.याप्रसंगी करंजी, बहादराबाद, टाकळी, बोलकी, बहादरपुर, माहेगाव देशमुख, दहेगांव बोलका, पढेगांव, नाटेगांव, काकडी, मनेगांव, अंजनापुर या गांवचे सरपंच, उपसरपंच सर्वश्री विकास मोरे, बाळासाहेब पानगव्हाणे, संदिप देवकर, रविंद्र आगवण, गणेश देवकर, शशिकांत देवकर, प्रकाश शिंदे, संतोष शिंदे, सुनिल पाईक, गणेश पळसकर, नवनाथ देवकर उपस्थित होते. या निवेदनात पुढे म्हटले आहे की, शहरी भागात आयकर विवरणपत्र दाखल करणा-या लाभार्थ्यांना कुठलेही निकष न लावता या योजनेचा लाभ दिला जातो तेच निकष ग्रामपंचायत स्तरावरील लाभार्थ्यांना लावावेत त्याचप्रमाणे या योजनेअंतर्गत सिस्टीम रिजेक्टेड त्रुटीमुळे असंख्य पात्र लाभार्थी अपात्र ठरविले जातात त्यांचाही ड वर्ग यादीत समावेश करण्यात यावा, ज्या लाभार्थ्यांना पक्के घर नाही व ते आर्थीकदृष्टया दुर्बल आहेत त्यांचा पात्र लाभार्थी यादीत समावेश करण्यात यावा जो पर्यंत या सर्व त्रुटी दुरूस्त होत नाहीत तोपर्यंत ग्रामपंचायत अंतर्गत ड वर्ग प्रधानमंत्री आवास योजना लाभार्थी यादी स्थगित करण्यांत यावी असेही शेवटी म्हटले आहे. गटविकास अधिका-यांच्यावर्तीने बांधकाम विभागाचे श्री. पवार यांनी निवेदन स्विकारले. प्रधानमंत्री आवास योजनेअंतर्गत ग्रामपंचायत स्तरावरील ड वर्ग लाभार्थ्यांसाठीचे जाचक निकष बदलावेत या मागणीचे कोपरगांव विधानसभा मतदार संघातील सरपंच व उपसरपंच यांच्यावतीने तहसिलदार विजय बोरुडे व गटविकास अधिकारी सचिन सुर्यवंशी यांना निवेदन देण्यांत आले.
