जेऊर कुंभारी वार्ताहर
भगवान गौतम बुद्ध यांच्या विचारांचा प्रसार, धम्मसंस्कारांची रुजवण आणि सामाजिक प्रबोधनाचा संदेश जनसामान्यांपर्यंत पोहोचविण्याच्या उद्देशाने जेऊर कुंभारी येथील गायकवाड वस्तीवर भव्य धम्मसोहळ्याचे आयोजन करण्यात आले. दि बुद्धिस्ट सोसायटी ऑफ इंडिया तथा भारतीय बौद्ध महासभा आणि अखिल भारतीय भिक्खू संघ यांच्या संयुक्त विद्यमाने मंगळवारी (दि. १०) आयोजित या सोहळ्याला ग्रामस्थांचा उत्स्फूर्त प्रतिसाद लाभला. यानिमित्त भिक्खू संघाचे आगमन होताच ग्रामस्थांनी रस्त्यावर आकर्षक रांगोळ्या साकारत आणि फटाक्यांची आतषबाजी करीत त्यांचे जल्लोषात स्वागत केले. या स्वागताने संपूर्ण परिसर धम्ममय वातावरणाने भारावून गेला.
या सोहळ्यास पूज्य भदन्त बी. संघपाल स्थवीर (व्यवस्थापक, चैत्यभूमी, मुंबई), पूज्य भदन्त आनंद सुमनसिरी थेरो (उकडगाव), पूज्य भदन्त संघप्रिय स्थवीर, पूज्य भदन्त शाक्यपुत्र अमृतानंद बोधी थेरो, पूज्य भदन्त डॉ. बी. सुमेध बोधीजी थेरो, पूज्य भदन्त मिलिंद बोधी थेरो, पूज्य भदन्त कश्यपजी, पूज्य भदन्त भारद्वाजजी, पूज्य भदन्त आनंददीप आणि पूज्य भदन्त धम्मसिरी आदी मान्यवर भिक्खूंची उपस्थिती होती. यावेळी भिक्खू संघाला विधिवत भोजनदान देऊन त्यांचा सन्मान करण्यात आला.
या उपक्रमाचा एक भाग म्हणून दि. ५ ते १५ नोव्हेंबर २०२६ या कालावधीत संत जगनाडे महाराज सांस्कृतिक भवन, कोपरगाव येथे श्रामनेर शिबिराचे आयोजन करण्यात आले आहे. या शिबिराच्या माध्यमातून भगवान गौतम बुद्धांचे तत्त्वज्ञान, बौद्ध धम्मातील आचार-विचार, जीवनमूल्ये आणि मानवतावादी संदेश यांची ओळख करून दिली जात आहे. समाजात बंधुता, समता, करुणा आणि शांततेची मूल्ये रुजविण्याच्या दृष्टीने हा उपक्रम महत्त्वपूर्ण ठरत आहे.
तसेच रविवार, दि. १५ नोव्हेंबर रोजी सकाळी १० वाजता महात्मा गांधी प्रदर्शन हॉल, साईबाबा कॉर्नर, कोपरगाव येथे भव्य धम्मपरिषदेचे आयोजन करण्यात आले आहे. या परिषदेला भारतीय बौद्ध महासभेचे राष्ट्रीय कार्याध्यक्ष डॉ. भीमराव यशवंतराव आंबेडकर यांची विशेष उपस्थिती लाभणार असून, परिसरातील बौद्ध अनुयायी व नागरिकांनी मोठ्या संख्येने उपस्थित राहावे, असे आवाहन आयोजकांच्या वतीने करण्यात आले आहे.
या धार्मिक व सामाजिक उपक्रमाचे निमंत्रक व स्वागतकर्ते म्हणून आरपीआयचे प्रदेश सचिव दीपकराव गायकवाड, किरण गायकवाड, किशोर गायकवाड आणि ग्रामपंचायत सदस्य प्रदीप गायकवाड यांनी विशेष पुढाकार घेतला. या सोहळ्यास परिसरातील बौद्ध अनुयायी, नागरिक आणि ग्रामस्थ मोठ्या संख्येने उपस्थित होते.
